(5)ی ئادارێ، ڕۆژەکا پڕ ڕامان و گرنگە ژ بزاڤا ڕزگاریخوازی یا گەلێ مە و گشت کوردستانییێن ب وەفا و خۆ ڕاگر، وەرچەرخانەکا دییە بۆ خەباتا نە ژبیرکری یا گەلێ مە و ب هەمی تەخ و چین پێکهاتەیانڤە.
سەرهلدانا، کو هەمی دەمان جهێ شانازیێیە بۆ دیرۆک و بزاڤا ڕزگاریخوازییا گەلێ کورد بۆ گەهشتن ب ئارمانجێن مە یێن ڕەوا و بجهئینانا مافێن مە یێن بن دەست و پێشێلکری، بەرهەمێ خەبات و خوینا خۆشتڤییێن گەلێ مە و پێشمەرگەیێن ب جەرگ بوو.
سەرهلدانا شەڕەفمەند یا (5ی ئادارێ) ب بڕیارا بەرەیێ کوردستانی و سەرکردایەتی یا سیاسی و هێز و لایەنێن سیاسییێن کوردستانێ و ب پشکدارییا جەماوەرێ دلسوز بەرنامە بۆ هاتە دارشتن، ل 5 ی ئادارا سالا 1991 ل باژێرێ ڕانیە دەرگەهێ سەرهلدانێ هاتە ڤەکرن و پاشی، گشت باژێر و باژێرکێن کوردستانێ ڤەگرتن ب کەرکووکا دلێ کوردستانێ ڤە.
سەرهلدان، گرنگیەکا دیروکی و پێنگاڤەکا وێرەک و ڕەوا یا گەلێ مە بوو، پشتی چەندین سالان ژ خەبات و قوربانیدانێ ئەو سەرکەفتنا مەزن بجهــ هات و کوردستانییان سەلماند، کو ب هزر و باوەریا ڕاستەقینە یا نیشتیمانپەروەری و خۆ ڕاگری و گیانێ شۆڕەشگرانە یێ گەلێ ستەم دیتی دێ هەر گەهیتە ئارمانجا خۆ.
ژ دەستکەفتێن هەرە گرنگ یێن سیاسی یێن سەرهلدانێ، دانان بنیاتێ ئەزموونەکا نوو یا دەستهەلاتکرنێ بوو، کو بڕیاردان بوو ل سەر سیستەمێ سیاسی یێ فیدڕالی، هەر وەسا ل 19 گولانا 1992 جڤاتا نیشتمانی یا کوردستانێ هاتە هەلبژارتن و حکومەتا کوردستانێ هاتە پێکئینان بۆ بڕێڤەبرن و بجهئینانا کاروبارێن هەرێمی.
ب درێژاهییا وێ ئەزموونا هەرێما کوردستانێ کو شەرعیەتا خۆ یا یاسای یا هەی، ئارمانجێن گەلێ مە و کوردستانییێن د ڤێ هەرێمێ دا ل گۆرەی کارناما کابینەیێن حکومەتێ بەرهەم هاتینە ب ڕێکا پرۆژەیێن گرنگ و ستراتیژی بۆ دانانا بنیاتێ ژێرخانا ئاڤەدانییی و دانانا بنیاتێ ژیارا وەلاتییان، هەر وەسا سەرجەم بوارێن ئاسایش و پیشەسازی و ساخلەمیی و کشتوکال و پەروەردە و گەشتیاری و پرۆژەیێن دی یێن خزمەتگوزاری.
وەلاتییێن بەرێز..
ئەڤرۆ سەقایێ سیاسییێ کوردستان و عیراق و دەڤەرێ ل هەمبەر کۆمەکا گۆڕانکارییان دایە، کو چارەنڤیسێ هەرێمێ و وەلاتییان یێ پێڤە گرێدایە، لەورا مە زێدەتر پێدڤی ب هاریکاری و هەڤدەنگییێ هەیە ژ بۆ کو ڕۆلێ خۆ یێ گرنگ ببینین و پێگەهێ سیاسی و دپلۆماسی یێ هەرێمێ بهێزتر لێبکەین.
ل سەر ئاستێ هەرێمێ ئەم ب هیڤینە هەمی هێز و لایەنێن سیاسی هەماهەنگییا زێدەتر بکەن و نەخشە ڕێیێن گونجای ب دارێژن بۆ جارەسەرکرنا پرس و ئاریشەیێن نوکە هەی، ل سەر ئاستێ عیراقا فیدڕال ژی ، دا کو جارەکا دی ئاریشە و قەیران دوبارە نەبنەڤە، دانوستاندن دگەل حکومەتا فیدڕال ڕێیا خۆ یا یا ڕاستەقینە بگرن بۆ چارەسەرکرنا بابەتێن گرنگ یێن ئەڤرۆ هەین وەک پرسێن بودجە و شایستەیێن دارایی یێن هەرێمی و بابەتێ نەفتێ و پرسێن هەلاویستی یێن دی.
د ڤێ هەلکەڤتا شەڕەفمەندانەدا، ئەم ژ پارتیا دیموکراتا کوردستانێ، وەک هەمی دەمان ل سەر هەمان پرەنسیپ و پەیاما ڕاست و دروست یا پارتیا مە دوپاتییێ ل سەر ڕێکخستنا ناڤمالا ناڤخۆی یا کوردستانێ دکەین و داخواز دکەین دگەل هەمی لایەکی بزاڤێن خۆ بکەینە ئێک و ب بەرپرسیارانە کاربکەین بۆ هندێ بەرژەوەندییێن بلند یێن گەلێ مە و ئارمانجێن مە یێن نێزیک و دەم درێژ ژ پێشینە یێن بەرنامە و کانامەیێن مە بن.
بۆ هندێ کو رۆژا (5ی ئادارێ) وەک هەلکەڤتەکا ئاسایی و بتنێ هەلکەڤتەکا دیروکی ڕەت نەبیت، بەڵگە هەردەم شاناسیا مە بیت، پێدڤیە پاشماوە و وانە و دەرئەنجام و دەستکەڤتێن وێ هەردەم پشتەڤان و ڕێنیشاندەرێن مە بن بۆ ئێکڕێزی و هەماهەنگییا زێدەتر و بنەمایێن ئەرێنی بهێنە بجهئینان بۆ ب دەستڤە ئیتنانا مافێن مە و د خزمەتا بەرژەوەندییا گشتی دابن.
ب ڤێ هەلکەڤتێ جارەکا دی ب پشتڕاستیڤە سوزێ ددەین و دوپاتییێ ل سەر بەرژەوەندییێن بلند یێن گەلێ مە و بەردەوامبوون ل سەر کار و ئەرکێن نەتەوەیی و نیشتیمانییێن مە بۆ داکوکیکرن ل بنەمایێن ڕاست و دروستێن دیموکراسیەت و هەمەڕەنگی و هەمەلایەنی یا هزر و باوەرێن سیاسی و بەرفرەهکرنا قەبارەیێ پشکداریکرنا سیاسی، هەروەسا باشترکرنا بارێ ئابووری و ژیانا ڕۆژانە یا وەلاتیان بکەین.
ل هەلکەڤتا سەرهلدانا شەڕەفمەندا 5 ئادارێ سەرێ ڕێزی بۆ شەهیدێن کورد و کوردستانێ و سەروەرێ وان بارزانییێ نەمر و کاک ئدریسێ هەردەم ل هزر د چەمینین..
سلاڤ بۆ جەماوەرێ خۆ ڕاگرێ کوردستانێ و پێشمەرگەیێن دلێر کو هێڤێنێ سەرکەفتنا سەرهلدانێ بوون..
سلاڤ بۆ گیانێ شەهیدێن سەرهلدانا 5 ئادارێ..
سلاڤ بۆ شەهیدێن بزاڤا ڕزگاریخوازییا کورد و کوردستانێ..
هەر مەزن و شەڕەفمەند بیت هێزا ژ بن نەچووی یا جەماوەر و هەلکەڤتا 5 ئادارا 1991.
