مەكتەبا رێكخستنا پارتی ل پارێزگەها دهۆکێ پەیامەك بەلاڤكر

مەكتەبا رێكخستنا پارتی دیموكراتی كوردستان ل پارێزگەها دهۆکێ ب هەلكەفتا سەرهلدانێ پەیامەك بەلاڤكر و ڕاگەهاند، بەری 32 سالان و ل هـەیڤا ئادارێ جەماوەرێ دلسوز و فیداكارێ دەڤەرا بادینان مل ب ملێن برایێن خۆ یێن پێشمەرگە دەست ب سەرهـلدانێ كر و د چەند رۆژەکاندا كۆچك و دیوانێن زۆلم و زۆریێ هـەرفاندن و تیڕۆشكێن ئازادیێ هـەلاتن.

مەكتەبا رێكخستنا پارتی دیاركر، سەرهلدانا دەڤەرا بادینان بەرسڤەکا توندبوو بۆ دوژمن و داگیركەرێن كوردستانێ بەرامبەر كریارێن وان یێن هـوڤایەتی ژ كوشتن، ئەنفالكرن، كێمیابارانكرن، ڤەگوهـاستن و وێرانكرنا باژێر و گوندان، سەرهلدانێ دیاركر كو ئیرادا مللەتان بهێزترە ژ ئاگر و ئاسنێن دوژمنان، مللەتێ داخازا ئازادیێ ژی بكەت بێگومان دێ گەردەنا رۆژا ئازادیێ ماچی كەت.

مەكتەبا رێكخستنا پارتی ل پارێزگەها دهۆکێ ل دوماهیكا پەیاما خۆدا گۆت، سلاڤ ل گیانێ بلند و پیرۆزێ شەهـیدێن سەرهلدانێ و پێشمەرگێن قەرەمان و جەماوەرێ خۆراگرێ دەڤەرا بادینان بن.