كابینا نههێ یا حكومەتا هەرێما كوردستانێ، ب جددی كاری ل سەر دروستكرن و ڤهدیتنا بازاری بۆ بەرهەمێن كوردستانێ دكهت ل وهڵاتان، بۆ ڤێ چهندێ سەرۆكوەزیرێن هەرێما كوردستانێ بەردەوام ل كۆڕ و كۆمبوون و كۆڕبەند و دیدارێن سیاسی و ئابووری یێن جیهانی دا پشكداره و گوتۆبێژان د ڤی واری دا دكهت.
د. دلاوەر ئاژگەیی، بەرپرسێ نوونەراتییا حكومەتا هەرێمێ ل ئێكهتییا ئورۆپا دبێژیت، بابەتێ هنارتنا بەرهەمێ ناڤخۆ كارهكێ باش ل سەر هاتییه كرن و سەرۆكێ حكومەتا هەرێما كوردستانێ، دهمێ سەرهدانا بڕۆكسل كری” ل گەل سەرۆكوەزیرێن بەلجیكا و هۆڵەندا و بەرپرسێن هەرێمان كۆمبوویه، ئێك ژ بابەتێن گرنگ ئەوبوو كو هاریكارییا هەرێما كوردستانێ بكەن دهربارەیی ب بازاركرنا بەرهەمێن ناڤخۆیی یێن هەرێما كوردستانێ ل ئورۆپا.
سەرۆكێ حكومەتا هەرێما كوردستانێ، ل سالا 2022 ێ زایینی، 217 دیدار و گوتۆبێژ و سەرهدان و پێشوازی هەبوون ل گەل سەرۆك و وەزیر و كەساتی یێن سیاسی و ئابووری یێن وهڵاتان، ب تایبەتی ئێكهتییا ئورۆپا.
د. دلاوهری گۆت ژی: ئێكهتییا ئورۆپا بازاڕهكێ مهزن و ههڤركییهكا زۆر تێدایە، ئەگەر هەرێما كوردستانێ بشێت وی دەرگههی ڤهكهت دێ مفایهكێ گههیته كهرتێ چاندنێ و داهاتێ هەرێما كوردستانێ، ئهڤ بیرۆكه ب دلێ بەرپرسێن ئێكهتییا ئورۆپا بوویه، چونكی وان دڤێت ب وێ رێكێ پتر هاریكارییا هەرێما كوردستانێ بكەن، بەلێ پێدڤی ب هندهك رێكاران ههیه، دڤێت ب رێیا ئێك ژ وهلاتێن ئێكهتییا ئورۆپا بهینه كرین، داكو بهرههمێ مه بگههیته بەلجیكا و هۆڵەندا، پشتی بشێین بۆ هەر 27 وهلاتێن ئێكهتییا ئورۆپا بهنێرین.
