كه‌مال كه‌ركووكى : كه‌ركووك یا د ده‌ستێن میلیشیاندا

به‌رپرسێ مه‌كته‌با پارتى دیموكراتى كوردستان یا رێكخستنا پارێزگه‌ها كه‌ركووك – گه‌رمیان، دبیره‌وه‌رییا سه‌رهلدانا خه‌لكێ كه‌ركووكێ ل سالا 1991ێ، داخوازا كاركرنا مادده‌یێ 140 ژ حكومه‌تا عیراقێ دكه‌ت و دبێژیت: كارێن ڤه‌گه‌راندنا پارتى بۆ كه‌ركووكێ تمامبووینه‌.

ل 20ى ئادارا 1991ێ خه‌لكێ كه‌ركووكێ ب هاریكارییا پێشمه‌رگه‌ى سه‌هلدان كر و باژێر ژ ده‌ستێن به‌عسییان قوورتالكر، دڤێ هه‌لكه‌ڤتێدا كه‌مال كه‌ركووكى د په‌یامه‌كێدا داخواز ژ حكومه‌تا عیراقێ كر مادده‌یێ 140 كارا بكه‌ت و دبێژیت: ئه‌و سۆزدێ د ده‌نه‌ خه‌لكێ كه‌ركووكێ كو دێ هه‌موو رێكێن قانوونى، سیاسى و ده‌ستوورى به‌رده‌ست كه‌ن، و دێ ل سه‌ر بزاڤێن خوه‌ بۆ بدووماهى ئینانا لاپه‌رێن ئالوزی، نه‌دادپه‌روه‌رى و ده‌ستدرێژییێ ل كه‌ركووكێ و هه‌موو ده‌ڤه‌رێن كوردستانێ یێن ژ ده‌رڤه‌ى ئیداره‌یا هه‌رێما كوردستانێ د به‌رده‌وامبن.

ل دۆر ئازادكرنا كه‌ركووكێ، كه‌مال كه‌ركووكى دبێژیت: ب بجهئینانا ئه‌وان خه‌ون و هیڤییان یێن كو خوینه‌كا زێده‌ بۆ هاتییه‌ رێژتن و كاروانه‌كێ درێژێ شه‌هیدان بخۆڤه‌گرتى، كه‌ركووك ژ به‌ندێ سه‌ر ده‌مێن سته‌م و بێدادى و ده‌هان سالێن داگیركرنا گه‌ل و ئاخا وێ هاتنه‌ ئازادكرن، و مه‌نجه‌لا ئازادییێ تێدا هاته‌ دانان، مه‌نجه‌لا نه‌وروزێ هاته‌ هه‌لكرن، و هه‌موو گه‌لێ وێ ئاهه‌نگێن سه‌ركه‌ڤتنێ ل سه‌ر دیكتاتۆرییه‌تێ گێران.

كه‌مال كه‌ركووكى گوت ژى : ئه‌ڤرۆژى كو ئه‌و جه‌ژنا ئازادى – جه‌ژنا نه‌وروزێ و سالیادا ئازادكرنا كه‌ركووكا باژێرێ ئازادییێ دگێرن، ئه‌و ترسا وێ ره‌وشا نه‌ئاسایى ژبیر ناكه‌ن، یا كو خه‌لكێ كه‌ركووكێ ب پێكهاته‌یێن جۆره‌وجۆر تێدا ل ژێر ده‌ستێ ده‌ستهه‌لاتا میلیشیا و گرۆپێن چه‌كدار ژبه‌ر ڤه‌گه‌ریانا سیاسیه‌تا شۆفینییا ب عه‌ره‌بكرنه‌كا دارێشتى و ده‌ست ب سه‌رداگرتنا زه‌ڤییان و ده‌ستدرێژیكرنا ل سه‌ر ساده‌ترین مافێن وه‌لاتیبوونێ و ئازادییێ كو ژ ئه‌نجامێ خیانه‌تا 16ێ ئوكتۆبه‌رێ نه‌، دژین.

ل دۆر ڤه‌گه‌ریانا پارتى دیموكراتى كوردستان بۆ كه‌ركووكێ، به‌رپرسێ مه‌كته‌با رێكخستنا پارێزگه‌ها كه‌ركووك – گه‌رمیان دیاركر، هه‌موو كار ب نڤێسین تمام بووینه‌ و نوكه‌ ب تنێ كردار مایه‌، و ئه‌و چاڤه‌رێى بریارا سه‌رۆكوه‌زیرێن عیراقێ نه‌ بۆ ده‌ركه‌ڤتنا هێزێن عیراقى ل باره‌گایێن پارتى.