ئێزیدى داخوازا ته‌رخانكرنا پێنج كورسییێن كۆتا ل په‌رله‌مانێ كوردستانێ دكه‌ن

ژماره‌یه‌كا كه‌سایه‌تییێن جڤاكى و سیاسى و ئه‌كادیمى و ره‌وشه‌نبیر و ماموستایێن ئێزیدى نامه‌یه‌ك ئاراسته‌یى هه‌رسێ سه‌رۆكایه‌تییێن كوردستانێ و رایا گشتى كر و داخوازا جێگیركرنا پێنج كورسییێن كۆتا بۆ پێكهاته‌یێ ئێزیدییان ل په‌رله‌مانێ كوردستانێ كر.

ئێزیدییان د نامه‌یا خوه‌دا بۆ هه‌رسێ سه‌رۆكایه‌تییێن هه‌رێمێ و حكومه‌تێ و په‌رله‌مانى دیاركر، ئه‌و ده‌نگێ خوه‌ بۆ په‌رله‌مانێ كوردستانێ بلند دكه‌ن، داكو وه‌كو پێكهاته‌یه‌كێ ره‌سه‌ن دناڤ گه‌لێ كوردستانێدا سه‌ره‌ده‌رى دگه‌لدا بهێته‌كرن، ئه‌وژى ب رێكا هه‌مواركرنا قانوونا هه‌لبژارتنان ب جۆره‌كى كو پێنج كورسییێن كۆتا وه‌كو پشكا ئێزیدییان بهێنه‌ ته‌رخانكرن، هه‌روه‌كو برایێن مه‌سیحى و توركمان.

زێده‌تر ئێزیدییان دنامه‌یا خۆدا دیاركر، ئه‌و كوردێن ره‌سه‌نن، لێ وان تایبه‌تمه‌ندییه‌كا دى هه‌یه‌، ئه‌وژى ئه‌وه‌ كو پێكهاته‌یه‌كێ ئایینى یێ جوودانه‌، و ب درێژاهییا مێژووییێ ژبه‌ر وێ باوه‌رییا ئایینى خوینه‌كا زێده‌ رووشتییه‌ و تووشى ده‌هان فه‌رمانان بووینه‌، كو دووماهیك فه‌رمان یا 74ێ بوو ل 3-8-2014ێ و جیهان هه‌موو شاهدحالێ هندێ بوو، كو رووبروو ژناڤبرن و كوشتنێ ببوون و ژنێن وان ب ئێخسیر هاتنه‌ ده‌سته‌سه‌ركرن و ره‌ڤاندن، هه‌ر ژبه‌ر ڤى ئه‌گه‌رى ئه‌و ب پێدڤى دزانن وان ل په‌رله‌مانێ كوردستانێ كورسییێن نوونه‌رایه‌تییێ هه‌بن، ژ پێخه‌مه‌ت پێشڤه‌برنا ئازادى و دیموكراسییێ ل ده‌ڤه‌رێ.