كۆمبوونا هه‌ردوو ده‌زگه‌هێن هه‌لبژارتنێن پارتى و ئێكه‌تییێ ب دووماهى هات، و سه‌رۆكێن هه‌ردوو فراكسیۆنان دیاردكه‌ن، ئه‌و ل سه‌ر هه‌موو خالێن تایبه‌ت ب هه‌مواركرنا قانوونا هه‌لبژارتنان رێككه‌ڤتن و داخواز ژ یونامییێ ژى كر، بوچوونا خوه یا فه‌رمى ل دۆر ڤێ چه‌ندێ رابگه‌هینیت.
هه‌ردوو ده‌زگه‌هێن هه‌لبژارتنێن پارتى و ئێكه‌تییێ ل باره‌گایێ هه‌لبژارتنێن پارتى ل هه‌ولێرێ كۆمبوون، دووڤدا هه‌ر ئێك ژ زانا مه‌لا خالد سه‌رۆكێ فراكسیۆنا پارتى دیموكراتى كوردستان و زیاد جه‌بار سه‌رۆكێ فراكسیۆنا ئێكه‌تى نیشتیمانى كوردستان ل په‌رله‌مانێ كوردستانێ، كو هه‌ردوو ئه‌ندامێن شاندێن كۆمبوونێ بوون، پرێسكۆنفرانسه‌كێ هه‌ڤپشك سازكر.
سه‌رۆكێ فراكسیۆنا پارتى ل په‌رله‌مانێ كوردستانێ راگه‌هاند، وان دگه‌ل شاندێ ئێكه‌تییێ دانوستاندن ل دۆر وان برگه‌یان كر یێن كو ل ده‌مێن بوورى رێككه‌ڤتن ل سه‌ر هاتییه كرن و ئاشكراكر، ئه‌و ل سه‌ر هه‌موو خالێن پێدڤى بۆ هه‌مواركرنا قانوونا هه‌لبژارتنان دگه‌ل ئێكه‌تییێ رێككه‌ڤتن و چ ناكۆكى نه‌مان.
سه‌باره‌ت كورسییێن پێكهاته‌یان ژى كو دهێته گوتن پارتى و ئێكه‌تییێ ناكۆكى ل سه‌ر هه‌نه، زانا مه‌لا خالاد ئاشكراكر، ئه‌و و ئێكه‌تى ل سه‌ر هندێ دكۆكن كو پێكهاته‌یێن ره‌سه‌نێن كوردستانێ ماف هه‌یه بوچوون و تێبینییێن خوه ده‌رباره‌ى هه‌مواركرنا قانوونا هه‌لبژارتنان هه‌بن، پێشتر دانوستاندن ل سه‌ر تێبینییان هاتییه كرن و دڤێ كۆمبوونێ ژیدا گوتوبێژا وان تێبینییان هاته كرن.
شانده‌كێ یونامییێ پشكدارى دكۆمبوونا ئه‌ڤرۆ یا هه‌ردوو ده‌زگه‌هێن هه‌لبژارتنێن پارتى و ئێكه‌تییێدا كربوو، ل دووڤ ئاخڤتنێن سه‌رۆكێ فراكسیۆنا پارتى، وان داخواز ژ شاندێ یۆنامییێ كر، بوچوونا خوه یا فه‌رمى ده‌رباره‌ى هه‌مواركرنا قانوونا هه‌لبژارتنان و ب رێڤه‌برنا هه‌لبژارتنێن په‌رله‌مانێ كوردستانێ ب پارتى و ئێكه‌تییێ رابگه‌هینن.
