رێڤنگ هرۆری: هژمارا لیوایێن هێزا پێشمەرگەیی گەهشتنە 24 لیوایێن هه‌ڤپشك

ئاژانسا خانی” زنار تۆڤی:

سەرۆکێ لژنا پێشمەرگەیی ل پەرلەمانێ کوردستانێ ئاشكرا كر: پرۆسا چاکسازییێ ل وەزارەتا پێشمەرگەیی یا بەردەوامە و نوكه‌ هژمارا لیوایێن هه‌ڤپشك بووینە 24 لیوا” هه‌روه‌سا گوهۆرین و یەکخستنا هێزێن پێشمەرگەیی دێ بەردەوام بیت و ل ده‌مێن داهاتی دێ گوهۆرین د ناڤا میحوەران ژی دا هێته‌ كرن.

رێڤنگ هرۆری، زێده‌تر بۆ ئاژانسا خانی دیار كر: دروستکرن و راگه‌هاندنا دو فیرقەیێن پیشمه‌رگه‌یی ل هەرێما کوردستانێ گه‌له‌كا گرنگه‌ و ئێکە ژ پێنگاڤێن چاکسازییێ یێن وەزارەتا پێشمەرگەیی و رێکخستنا هێزا پێشمەرگەیێ كوردستانێ، ئه‌ڤه‌ پێنگاڤه‌كا هه‌ره‌ گرنگ و پێدڤیبوو هاتییه‌ هاڤێتن” دیسان به‌ری نوكه‌ ب تنێ لیوا هەبوون و نوكه‌ پێنگاڤێن دروستکرنا فیرقەیان دەستپێکرینە و ئه‌ڤ گاڤه‌ گه‌له‌ك بۆ هه‌یكه‌لێ هێزا پێشمەرگه‌یی یا گرنگه‌.

سەرۆکێ لژنا پێشمەرگەیی ل پەرلەمانێ کوردستانێ گۆت ژی: بەرپرسێن میحوەران ژی نامینن و سیستەمێ هێزا پێشمەرگەیی ل سەر بنەمایێ لەشکه‌ری دێ هێته‌ دروست كرن و دێ گوهۆرین تێدا هێنه‌ كرن، ئەڤه‌ ژی دێ ب پێنگاڤان بیت، نوكه‌ چاکسازی یا بەردەوامە و کار ل سەر دهێته‌ كرن و ئەڤە ژی جهێ دلخۆشییێ یه‌ بۆ مه‌ هه‌موویان.

هرۆری هێشتا دبێژیت: به‌ری نوكه‌ وەزارەتا پێشمەرگەیی 20 لیوا هەبوون” ب دروستکرنا وان هه‌ردو فیرقەیان نوكه‌ هژمارا لیوایان بوویە 24 لیوایێن هه‌ڤپشك، ئه‌ڤه‌ كاره‌كێ گه‌له‌ك گرنگە بۆ یەکخستنا هێزا پێشمەرگەیی، چونکی ژ وان هه‌ردو فیرقەیان چار لیوایێن دیتر یێن هه‌ڤپشك ژ هەردو یەکەیێن 70 و80 هاتینه‌ دروست کرن.”