میرێ ئێزدییان ل دور وان ئاخفتنێن ل تۆرێن جڤاكی ل سەر دیدارا وی هاتینە گۆتن پەیامەك بەلاڤكر

چەند رۆژان بەری نوكە ل سەر ئێك ژ كەنالێن تەلەڤزیۆنی میر حازم تەحسین بەگ، میرێ ئێزدییان چاڤپێكەفتنەكا درێژ ئەنجامدابوو و پشتی هینگێ پارچەیەك ژ وێ چاڤپێكەفتنێ هاتیە برین و دناڤا تۆرێن جڤاكی دا هاتیە بەلاڤكرن. ل دۆر وێ چەندێ ئەڤرۆ میرێ ئێزدییان پەیامەك بەلاڤكر.

دەقێ پەیاما میر حازم تەحسین سەعید:

د چاڤپێكەفتنەكا مە دا لگەل ئێك ژ كەنالێن تەلەڤزیۆنی یێن كوردی، پارچەك ژێ هاتیە كورتكرن و ل تۆرێن جڤاكی هاتیە بەلاڤكرن دوویر ژ مەرەم و ئارمانجا مە یا دروست. د دەمەكی دا كو سوپاسییا هەموو لایەن و كەسایەتییێن ئێزدی دكەین یێن پەیوەندی ب مە كرین ژبەر ڤی بابەتی، مە دڤێت بۆ وان چەند رووهنكرنان بدەین:

1 . دیروكا خێزانا مە یا دیارە و مە خوە ب رێبازا ئێزدیاتییێ و باب و باپیرێن خوە ڤە گرتیە و بیروباوەرێن خوە پاراستینە و ئەم د بینین ئەڤ بیروباوەرە ” هێلا سورە “، ژبەركو مە خوینا باب و باپیرێن خوە گوری ڤی ئایینی و ڤان بیروباوەران كریە و باب و باپیرێن من ل سەر ڤێ رێبازێ چووینە و بەردەوام پاراستییە هەر ژ سەردەمێ میرنشینێن ئێزدیاتی. ئایینێ مە یێ راستەقینەیە و دێ ل سەر دووڤچوونا وێ رێبازێ د بەردەوام بین، ژبەركو ئێزدیاتی ئایینەكە كو ئەم شانازییێ پێ دبەین و بەردەوام بەرگرییێ ژێ دكەین و ئەڤ چەندە پێدڤی چ موزایەدە و داخوازییان نینە، ژبەركو ئەم دبینین ئەڤە ئەركەكێ پیروزە بنەمالا مە هەر ژ دەمێن كەڤن ب ستۆیێ خوە ڤە گرتییە. دیروك دیدەڤانە كو میر عەلی بەگێ مەزن ل گەلییێ عەلی بەگ هاتییە كوشتن ژ پێخەمەت بەرگریكرنێ ژ ئێزدیاتییێ ل سالا 1832ێ. هەروەسا هەلویستێ باپیرێ من عەلی بەگ كورێ حسێن بەگ ئەوێ هاتییە نەفیكرن بۆ باژێرێ سیواس ل توركیا ژبەركو رەتكر هیچ گوتنەكا كرێت دەربارەی ئێزدیاتییێ بێژیت. و بابێ من میر تەحسین بەگ بۆ دەمێ 70 سالان خوە ب رێبازا ئێزدیاتییێ و ئایینێ ئێزدی یێ پیروز ڤە گرتییە. ژبەر ڤێ یەكێ، پتر ژ جارەكێ تووشی گڤاشتن و هەوێن تیرۆركرنێ بوویە. هەروەسا ئەز ژی زێدەتری 30 سالان وەكیلێ میری بووم و هیچ رەفتارەك یان كارەك دژی ئێزدیاتییێ و ئایینێ ئێزدیان من نەكریە و بەردەوام ل سەر رێبازێ چوویمە.
2. ئەوا ل تۆرێن جڤاكی هاتیە بەلاڤكرن، پارچەكا كورت بوو ژ چاڤپێكەفتنەكا درێژ كو ئەز تێدا ل سەر كاكلكا ئایین و هزرا سەرەكی یا ئایین و بنەمایێن مرۆڤایەتییێ ئەوێن دناڤا ئێزدیاتییێ دا هەین ئاخفتبووم، بۆ دەمێ هزاران سالایە ئایینێ ئێزدی گرنگییێ ب قەول و سەبەقێن خوە یێن پیروز ددەت كو بەردەوام دخوازن هەموو مللەت و نەتەوە د پاراستی بن. ئانكو ئەم ئاشتییێ و باشییێ بۆ هەموویان دخوازین و ئەڤە یا ئاشكەرایە د هەموو وان مەراسیمان دا یێن ئەم ئەنجام ددەین. ئایین رێیەكە ژبۆ پێكڤەژیان و برایەتی و ئاشتی و خوشەویستییێ دناڤ مروڤان دا و ئەڤە ئێكە ژ بنەمایێن ئێزدیاتییێ. ژبەركو ئەم رێزێ ل هەموو ئایین و بیروباوەران دگرین، ئەڤە رامانا وێ چەندێ نادەت كو ئەم دەستان ژ بیروباوەرێن خوە یێن ئێزدیاتییێ بەردەین.

3. جهێ داخێ یە هندەك لایەن ژبەر ئەگەرێن جوداجودا گوتنێن نە رەوا دەربارەی مە دبێژن، و وێنەیێ مەرجەعییەتا ئێزدیاتیێ ب دروستی نا ڤەگوهێزن، و ئەڤ لایەنە نزانن كو ئەو خرابییێ ل خوە دكەن بەری كو خرابییێ بگەهیننە مە. میری و جڤاتا وی یا روحانی پێنگاڤێن راستەقینە بۆ خزمەتكرنا ئێزدیاتییێ و دانەنیاسینا كەیسا ئێزدیان ل سەر ئاستێ جیهانێ هاڤێتینە، نه‌خاسمه‌ پشتی سەرەدانێن بەردەوام و چاڤپێكەفتنان دگەل مەرجەعیات و لایەنێن سیاسی و ئایینی یێن عەرەبی و عیراقی و جیهانی و كوردی یا كو هێزەكا دی دایە كێشەیا ئێزدییان.
4. ئەز باش دزانم كو گەلەك ئاراستەیێن سیاسی دناڤا جڤاكێ ئێزدی دا هەنە و دید و بوچوونێن جێواز هەنە. پێدڤییە هەموو بزانن كو ئەم وەكو دەزگەهەكێ ئایینی یێ ئێزدی و میرێ ئێزدییان ل سەر ئێك ئاست بەرێ خوە ددەینە هەموو وان بوچوونێن دناڤ ئێزدییان دا هەین و ب دیتنەكا بابینی لێ دنێرین.
ل ڤێرێ ئەز داخوازێ ژ هەموویان دكەم كو د هوشیار و هویربین و راستگو بن د داخویانییان دا و بابەتان تێكەلی ئێك نەكەن، ژبەركو د بەرێ دا و نوكە دا و دێ بەردەوام د وەفادار بین بۆ بیروباوەرێن ئێزدیاتییێ و یا د شیانێن مە دا بیت دێ كەین ژبۆ خزمەتا ئێزدیاتییێ و پاراستنا بیروباوەرێن باب و باپیرێن خوە یا كو مە جوبارێن خوینا خوە بۆ كرینە قۆربان و د درێژییا دیرۆكا خوە دا ئێزدی تووشی 74 فەرمانان بووینە پێخەمەتی پاراستنا ڤی ئایینی و بیروباوەرێن ئێزدیاتی یێن پیروز.