پێنج یاریكه‌رێن یانه‌یا دهۆكێ بایكوتا راهێنانان كرییه‌

پێنج یاریكه‌رێن یانه‌یا دهۆك ئه‌وا دخۆلا نایابا كوردستانێدا پشكدار ژبه‌ر نه‌وه‌رگرتنا مووچه‌ی بایكوتا راهێنانان كرییه‌، و د بێژن: په‌یوه‌ندییێن وان دگه‌ل یانه‌یێ ب دووماهى هاتن.

ئێك ژ وان یاریكه‌رێن بایكوت كرى كو نه‌ڤییایه‌ ناڤێ خوه‌ ئاشكرا بكه‌ت بۆ ئاژانسا خانى راگه‌هاند، بۆ ده‌مێ سێ هه‌یڤانه‌ وان مووچه‌ نه‌ وه‌رگرتى، ل ده‌ستپێكێ ئه‌و هه‌شت یاریكه‌ر بووین كو بایكوتا راهێنانان كرى، لێ دوو یاریكه‌ر ژ بایكوتا خوه‌ لێڤه‌بوون و ڤه‌گه‌ریانه‌ دناڤ تیمێدا، و یاریكه‌ره‌كى ژى ب تمامى ده‌ست ژ فوتبۆلێ به‌ردا، و ئه‌و پێنج یاریكه‌رێن ماین ل سه‌ر بریارا خوه‌ د رژدن و ناڤه‌گه‌رنه‌ تیمێ.

زێده‌تر وى یاریكه‌رى ئاشكراكر، ره‌وشا دارایى یا وان یاریكه‌رێن بایكوت كرى گه‌له‌ك یا خرابه‌، وان گه‌له‌ك جاران داخوازا مووچه‌یێ خوه‌ ژ به‌رپرسێن یانه‌یێ كرییه هه‌روه‌سا داخوازا په‌سه‌ندێن ده‌ست ژ كاركێشانا خوه ژى‌ كرییه‌، لێ ئه‌و دبێژن: وان چ پاره‌ ل به‌ر ده‌ست نینن و نوكه‌ نه‌شێن چ مووچه‌یان بده‌ن، و په‌سه‌ندێن ده‌ست ژ كاركێشانا وانژى ناده‌ته‌ ده‌ستێن وان، لێ ئه‌و نا راوه‌ستن و دێ ل سه‌ر بزاڤێن خوه‌ د به‌رده‌وام بن هه‌تاكو د گه‌هنه‌ مافێن خوه‌، و ئێدى ناڤه‌گه‌رنه‌ ناڤ رێزێن تیمێ و په‌یوه‌ندییێن وان دگه‌ل یانه‌یێ بدووماهى هاتن.