سه‌رۆكێ هه‌رێما كوردستانێ دگه‌ل كۆمیسیۆنا بلندا سه‌ربه‌رخۆ یا هه‌لبژارتنێن عیراقێ كۆمبوو

نێچیرڤان بارزانى سه‌رۆكێ هه‌رێما كوردستانێ دگه‌ل كۆمیسیۆنا بلندا سه‌ربه‌خۆ یا هه‌لبژارتنێن عیراقێ كۆمبوو، كۆمسیۆنا عیراقێ ل سه‌ر گازییا سه‌رۆكایه‌تییا هه‌رێما كوردستانێ بۆ دانوستاندكرنێ ل سه‌ر به‌رهه‌ڤییێن هه‌لبژارتنێن بهێن یێن په‌رله‌مانێ كوردستانێ سه‌ره‌دانا هه‌ولێرێ كربوو.

دكۆمبوونێدا كو جێنین پلاسخارت نوونه‌را تایبه‌ت یا سكرتێرێ گشتییێ نه‌ته‌وه‌یێن ئێكگرتى ل عیراقێ، جێگرێن سه‌رۆكێ هه‌رێما كوردستانێ، تیمه‌كا بسپۆرییا یونامییێ و سه‌رۆك و ئه‌ندامێن جڤاتا كۆمیسیارێن عیراقێ تێدا د پشكداربوون، سه‌رۆك نێچیرڤان بارزانى دووپاتكر، پێدڤییه‌ زوو پێنگاڤ بۆ كرنا هه‌لبژارتنێن هه‌رێما كوردستانێ بهێنه‌ هاڤێتن، ل دور ڤێ چه‌ندێ ئاماده‌ییا سه‌رۆكایه‌تییا هه‌رێمێ و حكومه‌ت و هه‌موو لایه‌نێن په‌یوه‌ندیدارێن هه‌رێما كوردستانێ بۆ سه‌رخستنا ڤێ پرۆسه‌یێ ده‌ربرى.

ژلایێ خۆڤه‌ جێنین پلاسخارت و تیما یونامییێ پشته‌ڤانییا خوه‌ بۆ پێنگاڤێن سه‌رۆك نێچیرڤان بارزانى راگه‌هاند و ئاماده‌یی بۆ پێشكێشكرنا هاریكارییان بۆ سه‌رخستنا هه‌لبژارتنان نیشاندا.

دووڤدا سه‌رۆكێ كۆمیسیۆنا بلندا سه‌ربه‌خۆ یا هه‌لبژارتنێن عیراقێ و جڤاتا كۆمیسیاران سوپاسییا سه‌رۆكێ هه‌رێما كوردستانێ كر بۆ گازیكرن و گرنگیدانا وان ب راگوهۆرین و دانوستاندنان، هه‌روه‌سا به‌رهه‌ڤییا خوه‌ نیشاندا كو ل دووڤ قانوونێ و پشتى به‌رده‌ستكرنا پێدڤییان و رێككه‌ڤتن ل سه‌ر ده‌مه‌كێ گونجاى، هه‌لبژارتنێن هه‌رێما كوردستانێ ب رێڤه‌ببه‌ن، دڤى بیاڤیدا بریار هاته‌ دان په‌یوه‌ندییێن به‌رده‌وام بۆ دیاركرنا ده‌مه‌كێ گونجاى بۆ هه‌لبژارتنان هه‌بن.