سه‌رۆكێ حكومه‌تا هه‌رێما كوردستانێ پێشوازى ل شانده‌كێ بلندێ نه‌ته‌وه‌یێن ئێكگرتى كر

د دیدارا دناڤبه‌را سه‌رۆكێ حكومه‌تا هه‌رێما كوردستانێ و شانده‌كێ بلندێ نه‌ته‌وه‌یێن ئێكگرتیدا، به‌حس ل چاكسازییین كابینه‌یا نه‌هێ ژلایێ هه‌مه‌جۆركرنا ئابوورى و دیجیتالكرنا خزمه‌تگوزارییان و كاراكرنا سیسته‌مێ بانكى و ئاسانكاریكرنێڤه‌ بۆ وه‌به‌رهێنه‌رێن ناڤخۆ و ده‌رڤه هاته‌ كرن.

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل شانده‌كێ بلندێ نه‌ته‌وه‌یێن ئێكگرتى ب سه‌رۆكایه‌تییا عه‌بدولا ده‌رده‌رى هاریكارێ سكرتێرێ گشتییێ نه‌ته‌وه‌یێن ئێكگرتى و رێڤه‌به‌رێ هه‌رێمییێ به‌رنامه‌یێن نه‌ته‌وه‌یێن ئێكگرتى بۆ پێشڤه‌برنا ( UNDP ) تایبه‌ت ب وه‌لاتێن عه‌ره‌بى كر.

د دیداره‌كێدا هاریكارێ سكرتێرێ گشتییێ نه‌ته‌وه‌یێن ئێكگرتى كورتییه‌ك ده‌رباره‌ى كار و چالاكییان و ئارمانجا سه‌ره‌كییا سه‌ره‌دانا خوه‌ بۆ عیراق و هه‌رێما كوردستانێ خواند، كو مه‌ره‌ما وان هاریكاركرنه‌ د بوارێ هه‌مه‌جۆركرنا ئابوورى و ژێده‌رێن داهاتى و رووبرووبوونا كارتێكرنێن نه‌رێنى یێن گوهۆرینا سه‌قایدا‌.

ژلایێ خۆڤه‌ سه‌رۆكوه‌زیران مه‌سرور بارزانى ئاماژه‌ ب چاكسازییێن كابینه‌یا نه‌هێ ژلایێ هه‌مه‌جۆركرنا ئابوورى و دیجیتالكرنا خزمه‌تگوزارییان و كاراكرنا سیسته‌مێ بانكى و ئاسانكاریكرن بۆ وه‌به‌رهێنه‌رێن ناڤخۆ و بیانى دا.

هه‌روه‌سا دكۆمبوونێدا به‌حس ل گرنگییا پاراستنا سامانێ ئاڤێ و دروستكرنا به‌نداڤان هاته‌ كرن.