كۆمیسیۆنا هه‌لبژارتنێن عیراقێ : كارتا ده‌نگدانێ ئه‌گه‌ر وێنه‌یێ ده‌نگده‌رى ل سه‌ر نه‌بیت، ناهێته‌ بكارئینان

كۆمیسیۆنا بلندا سه‌ربه‌خۆ یا هه‌لبژارتنێن عیراقێ ده‌ستپێكرنا پرۆسه‌یا نووكرنا تۆمارا ده‌نگده‌ران ل 15 پارێزگه‌هان راگه‌هاند.

داود سه‌لمان رێڤه‌به‌رێ رێكار و راهێنانێن سه‌ر ب كۆمسیۆنا بلندا سه‌ربه‌خۆ یا هه‌لبژارتنێن عیراقێڤه‌ دیاركر، بۆ هه‌لبژارتنێن جڤاتێن پارێزگه‌هان ب تنێ كارتا ده‌نگدانێ یا بایۆمه‌ترییا هه‌رده‌مى كو وێنه‌ ل سه‌ره‌ دێ هێته‌ بكارئینان، له‌وما ئه‌و ده‌نگده‌رێن كارتا ده‌نگدانێ یا ده‌مكى هه‌ى و وێنه‌یێ وان ل سه‌ر نینه‌، بلا سه‌ره‌دانا ناڤه‌ندێن تۆماركرنا ده‌نگده‌ران بكه‌ن و داتایێن باتۆمه‌ترى نوو بكه‌ن.

راگه‌هاند ژى، قووناغا نووكرنا تۆمارا ده‌نگده‌ران رێك ب ڤه‌گۆهاستنا ده‌نگده‌ران دناڤبه‌را پارێزگه‌هاندا دا، ژبلى پارێزگه‌هێن هه‌رێما كوردستانێ، ژبه‌ركو هه‌لبژارتنێن جڤاتێن پارێزگه‌هان، پارێزگه‌هێن هه‌رێما كوردستاێ ناگریت.

ئاشكرا ژى كر، ئه‌و ده‌نگده‌رێن دخوازن بنگه‌هێن خوه‌ یێن ده‌نگدانێ ب گوهۆرن، دڤێت سه‌ره‌دانا نێزیكترین ناڤه‌ندێن تۆماركرنێ ل ده‌ڤه‌رێن خوه‌ بكه‌ن، یان جهێن كارێن خوه‌ ب مه‌ره‌ما نووكرنا داتایان.

گوت ژى : هه‌ر ده‌نگده‌ره‌ك ل پارێزگه‌ها خوه‌ یێ ئاكنجى نه‌بیت و ل به‌غدا یان پارێزگه‌هێن دى ئاكنجیبوویه‌ و كار دكه‌ت، دشێت ل سیسته‌مێ ( كۆمپیۆته‌رێ نیشتیمانى ) كو ل هه‌موو ناڤه‌ندێن تۆماركرنێ ل سه‌رانسه‌رى عیراقێ هاتینه‌ دانان، داتایێن خوه‌ نوو بكه‌ن، لێ هه‌موو ده‌نگده‌ر دڤێت ل جهێ ژ دایكبوونا خوه‌ ب كارتا بایۆمه‌ترییا هه‌رده‌مى كو وێنه‌یێ ده‌نگده‌رى ل سه‌ره‌، ده‌نگى بده‌ن.