بڕیارە ل حەفتیا بهێت مەرسوما سەرۆکایەتیا هەرێمێ بۆ دیارکرنا ڕۆژا بڕێڤەچوونا هەلبژارتنێن هەرێما کوردستانێ بهێتە دەرکرن

بەرپرسێ پشکا یاسایییا هەلبژارتنێن پارتی دیمەکراتی کوردستان:”لایەنێن سیاسی یێن عیراقێ د هەڤرکییێ دانە و نا خوازن دەمێ یاسایی یێ کۆمسیونا بلند یا هەلبژارتنێن عیراقێ بهێتە درێژکرن، دا کو هەلبژارتنێن پەرلەمانێ کوردستانێ بهێنە کرن.“

هەوار محەمەد، بەرپرسێ پشکا یاسایییا هەلبژارتنێن پارتی دیمەکراتی کوردستان بۆ ئاژاناسا خانی گۆت:”پێدڤیە ل دەمەکێ نێزیک سەرکردایەتیا سیاسی یا هەرێما کوردستانێ چارەسەریەکێ بۆ دیارکرنا دەمێ هەلبژارتنێن پەرلەمانێ هەرێما کوردستانێ ببینیت، چونکی کومسیۆنا بلند یا هەلبژارتنێن عیراقێ ڕۆژا 18 شووباتا 2024، وەکو پێشنیار بۆ بڕێڤەبرنا هەلبژارتنێن پەرلەمانێ هەرێما کوردستانێ دیارکریە، لێ دگەل هندێ ژی ئەو دەمێ ژ لایێ کومسیۆنا بلند یا هەلبژارتنێن عیراقێ ڤە هاتیە دیارکرن، هەڤدژی دەمێ یاسایی یێ کارابوونا کومسیۆنێ یە، چونکی ل 7 کانوونا دووێ یا 2024، دێ دەمێ یاسایی یێ جڤاتا کومسیارێن عیراقێ ب دوماهی هێت و پێدڤیە جڤاتا کومسیاران جارەکا دی ل جڤاتا نوونەرێن عیراقێ ب ڕێا دەنگدانێ دەمێ خۆ یێ یاسایی درێژ بکەتە ڤە، ئەڤە ددەمەکی دایە  پشتی کو کومسیۆنا بلند یا هەلبژارتنێن عیراقێ وەکو پێشنیار ڕۆژا 18 شووباتا 2024 بۆ برێڤە برنا هەلبژارتنێن پەرلەمانێ کوردستانێ دیارکری، گەلەک ژ لایەنێن سیاسی یێن عیراقێ بزاڤان دکەن دەمێ یاسایی یێ کومسیۆنا بلند یا هەلبژارتنێن عیراقێ کو دێ ل 7 شووباتا 2024 ب دوماهی هێت، نە هێتە درێژکرن.”

دەربارەی برێڤەچوونا هەلبژارتنێن پەرلەمانێ هەرێما کوردستانێ بێی سەرپەرشتیا کومسیۆنا بلند یا عیراقێ هەوار محەمەد گۆت:” ل گۆرەی یاسایا سەرۆکایەتیا هەرێما کوردستانێ ماددا 10 برگا 5ێ ژ دەستهەلاتێن سەرۆکێ هەرێما کوردستانێ د حالەتێن وەکی نوکە دا کو دەستهەلاتا یاسا دانان ل هەرێما کوردستانێ نەمایە و ژلایێ دادگەها فیدڕالی ڤە هاتیە هەلوەشاندن، سەرۆکێ هەرێما کوردستانێ ب ڕاوێژ دگەل سەرۆکێ حکومەتا هەرێما کوردستانێ و سەرۆکا پەرلەمانێ هەرێما کوردستانێ شیان هەنە بڕیارێ دەر بکەن، چونکی هێزا یاسا دانانێ هەیە و دێ جهێ یاسایێ گرن، ب ڤێ چەندێ ژی دشێن دەستەیاکا دادوەران بۆ کومسیۆنا بلند یا هەلبژارتنان دەستنیشان بکەن داکو سەرپەرشتیا هەلبژارتنێن هەرێما کوردستانێ بکەن.”

بەرپرسێ پشکا یاسایییا هەلبژارتنێن پارتی دیمەکراتی کوردستان دیارکر:”بڕیارە ل حەفتیا بهێت لسەر پێشنیارا جڤاتا کۆمسیارێن عیراقێ مەرسوما سەرۆکایەتیا هەرێما کوردستانێ بۆ دیارکرنا ڕۆژا بڕێڤەچوونا هەلبژارتنێن هەرێما کوردستانێ بهێتە دەرکرن، لەورا هیڤیدارین کارتێکرنێن یاسایی لسەر هەولویستێ جڤاتا کۆمسیارێن عیراقێ نەبیت و بشێن ل دەمێ کو دەستنیشانکری د ئامادەبن و ل ئاستێ سوزا خۆ بن بۆ بڕێڤەبرنا هەلبژارتنێن هەرێما کوردستانێ، کو د نوکە دا وەکو یا دیار هەرێما کوردستانێ د بوشاهییا یاسا دانانێ دایە، ئەڤ چەندە ژی بەرپرسیارەتیەکا قانوونی و ئەخلاقییە لسەر هەمی دامو دەزگەهێن شەرعی یێن عیراقێ و پێدڤیە هەمی لیەک هەست ب ئەڤێ بەرپرسیارەتیێ بکەت.”