زۆزان کۆچەر: بۆ وەرگرتنا گەنمێ جۆتیاران بەغدا یا پێگیر نەبوو

ئاژانسا خانی ” تایبەت:

ئەندامەکا لژنا چاندنێ ل پەرلەمانێ عێراقێ ئاشکرا کر، پرۆسا وەرگرتنا گەنمی ب دووماھی ھاتییە و بەغدا یا پێگیر نەبوویه‌ ب سۆزا خوە بۆ وەرگرتنا ھەموو بەرھەمێ جووتیارێن ھەرێما کوردستانێ.

 زۆزان کۆچەر، زێده‌تر بۆ ئاژانسا خانی دیار کر” دەستپێکێ حوکمەتا عێراقێ بڕیاردابوو ٣٠٠ ھزار تەنێن گەنمێ جۆتیارێن ھەرێما کوردستانێ وەر بگریت، بەلێ مە ھەموو بزاڤ کرن، کو ئەو رێژە بھێتە زێدە کرن و گەھاندە ٥٠٠ ھزار تەنێن گەنمی، ھەر چەندە بڕیار بوو پشتی وەرگرتنا وان ٥٠٠ ھزار تەنان ژی ھندی ھەبیت بەرھەمی جۆتیاران یێ ئەڤ سالە بھێتە وەرگرتن، بەلێ حوکمەتا عێراقێ پێگیری ب سۆزا خوە نەکر و ب تنێ ٥٠٠ ھزار تەن ھاتنە وەرگرتن.

ناڤهاتییێ گۆت ژی” ده‌مێ لژنا چاندنێ سەرەدانا پارێزگەھێن ھەرێما کوردستانێ کری‌ و ب چاڤێن خوە دیت” كو ھێشتا بەرھەمێ ھندەک دەڤەران نەگەھشتییە دروینێ و بڕیاربوو ھەموو بەرھەم بھێتە وەرگرتن، بەلێ مخابن عێراق یا پێگیر نەبوو، مە پلان ھەیە بۆ سالا بهێت پشکا ھەرێما کوردستانێ بھێتە زێدە کرن و وەکی ئەڤ سالە نەبیت و گەنم زۆر مایە نەھاتییە وەرگرتن و زیان گەھشتییە جۆتیاران.