فوئاد حسێن : داخوازێ ژ كۆمپانییێن وه‌لاتێن كه‌نداڤ دكه‌ین وه‌به‌رهێنانێ ل عیراقێ بكه‌ن

دپرێسكۆنفرانسه‌كیدا دگه‌ل سكرتێرێ جڤاتا هاریكارییا كه‌نداڤى، فوئاد حسێن وه‌زیرێ ده‌رڤه‌ یێ عیراقێ راگه‌هاند، دانوستاندن ل سه‌ر ب هێزكرنا په‌یوه‌ندییێن ئابوورییێن وه‌لاتێن كه‌نداڤ و عیراقێ، كا چه‌وا ب هێزتر و به‌رفره‌هتر لێ بكه‌ن، هاته‌ كرن، داخوازێ ژ كۆمپانییێن وه‌لاتێن كه‌نداڤ دكه‌ن ل عیراقێ وه‌به‌رهێنانێ بكه‌ن.

فوئاد حسێن وه‌زیرێ ده‌رڤه‌ یێ عیراقێ د پرێسكۆنفرانسه‌كیدا دگه‌ل جاسم محه‌مه‌د بدێوى، سكرتێرێ گشتییێ جڤاتا هاریكارییا كه‌نداڤى راگه‌هاند، سكرتێرێ گشتییێ جڤاتا هاریكارییا كه‌نداڤى دانوستاندن ل سه‌ر ب هێزكرنا په‌یوه‌ندییێن ئابوورییێن عیراقێ و وه‌لاتێن كه‌نداڤى كر، هیڤی خواستن ئه‌وان په‌یوه‌ندییان زێده‌تر پێشبێخن.

وه‌زیرێ ده‌رڤه‌ یێ حكومه‌تا عیراقێ ئاشكراكر، دڤێ كۆمبوونێدا دانوستاندن ل سه‌ر گرێدانا كاره‌با عیراقێ ب كاره‌با وه‌لاتێ سعوودییێ ڤه‌ هاته‌ كرن.

فوئاد حسێنى گوت : ئه‌و داخوازێ ژ كۆمپانییێن وه‌لاتێن كه‌نداڤى دكه‌ن ل عیراقێ وه‌به‌رهێنانێ بكه‌ن.

دیار ژى كر، ئه‌وان پێدڤى ب وه‌به‌رهێنانێ هه‌یه‌، كۆمپانییێن وه‌لاتێن كه‌نداڤی ژى ل گه‌له‌ك وه‌لاتان وه‌به‌رهێنانێ دكه‌ن، ئه‌و پێدڤى ب كۆمپانییێن وه‌لاتێن كه‌نداڤى نه‌ و ده‌رگه‌هێن عیراقێ هه‌رده‌م بۆ وان دڤه‌كرینه‌.

به‌حس ل هندێ ژى كر، هنده‌ك ژ كۆمپانییان دلگرانییا ئه‌مى هه‌یه‌ و هنده‌كان ژى دلگرانى ژ پاشه‌رۆژا خوه‌ هه‌یه‌، پشكه‌كا دانوستاندنان بۆ ڤان بابه‌تان هاتبوو ته‌رخانكرن، ب تایبه‌تى سه‌ره‌ده‌ریكرن دگه‌ل سندۆقا سیادى و سندۆقا تایبه‌ت كو كارێ ئه‌ڤان كۆمپانییان به‌رده‌ست و جهگیر دكه‌ت.