وه‌لاتێن دئێكه‌تییا ئورۆپادا ئه‌ندام ل سه‌ر چاكسازییێ دسیسته‌مێ په‌نابه‌رییێدا ڕیككه‌ڤتن

ئێكه‌تییا ئورۆپا و په‌رله‌مانێ ئورۆپا ل سه‌ر هندێ ڕێككه‌ڤتن كو گوهۆرینان دسیسته‌مێ په‌نابه‌رێن ئێكه‌تییێدا بكه‌ن.

ڕۆبێرتا میتسۆلا سه‌رۆكا په‌رله‌مانێ ئورۆپا د پۆسته‌كیدا ل سه‌ر ئه‌كاونتێ خوه یێ‌ ئێكس ئه‌و ڕێككه‌ڤتنه‌ ب گرنگ هژمارت و گوت: ئێكه‌تییا ئورۆپا گه‌هشته‌ رێككه‌ڤتنه‌كا گرنگ ل سه‌ر كۆمه‌كا قانوونێن نوو بۆ په‌نابه‌ران.

ڕێككه‌ڤتن بوویه‌ جهێ خۆشحالییا ئیتالیا و ئه‌لمانیا، ئه‌نالیا بێربۆك وه‌زیرا ده‌رڤه‌ یا ئه‌لمانیا ڕاگه‌هاند، ئه‌ڤ ڕێككه‌ڤتنه‌ گه‌له‌ك یا پێدڤى بوو، مه‌ده‌كێ درێژ گیروبوو.

ناڤه‌رۆكا ڕێككه‌ڤتنێ چه‌وایه‌؟

ئێكه‌تییا ئورۆپا ڕاگه‌هاند، ئارمانج ژ ڕێككه‌ڤتنێ ئه‌وه‌ كو ژماره‌یا وان كۆچبه‌رێن ب ڕێیێن نه‌قانوونى خوه‌ دگه‌هیننه‌ وه‌لاتێن د ئێكه‌تییا ئورۆپادا ئه‌ندام، كێمبكه‌ن.

د ڕێككه‌ڤتنێدا هاتییه‌، ئه‌و كۆچبه‌رێن دگه‌هنه‌ ئێكه‌تییا ئورۆپا دڤێت ل ده‌مه‌كێ زووتر لێكۆلین دگه‌لدا بهێته‌كرن، چه‌ند ناڤه‌ندێن ڕاگرتنا كۆچبه‌ران ل سه‌ر سنۆران دێ هێنه ڤه‌‌كرن،  له‌ز د دیپۆرتكرنا وان كۆچبه‌راندا هێته‌كرن یێن داخوازێن وان بۆ مافێن مانێ هاتینه‌ ڕه‌تكرن.

ل دووڤ ڕێككه‌ڤتنێ فشار ل سه‌ر وان وه‌لاتێن دكه‌ڤنه‌ پشكا باشوورێ ئێكه‌تییێ دێ كێمبیت، كۆچبه‌ر دێ ب شێوه‌یه‌كێ یه‌كسان دناڤبه‌را ئه‌ندامێن ئێكه‌تییێدا هێنه‌ به‌لاڤكرن.