سهرۆكێ ئێكهتییا سهندیكا كرێكارێن كوردستانێ لقێ دهۆك ڕاگههاند، 145 كرێكارێن دهۆكێ مووچهیێ خانهنشینییێ وهردگرن، مووچهیێ وانژى دناڤبهرا 250 هزار بۆ دوو ملیۆن دیناراندایه.
وهلات ئهمین ئوزمانى سهرۆكێ ئێكهتییا سهندیكا كرێكارێن كوردستانێ لقێ دهۆك بۆ ئاژانسا خانى دیاركر، ههتا نوكه 145 كرێكار ب شێوهیهكێ فهرمى ل دهڤ حكومهتا ههرێما كوردستانێ هاتینه خانهنشینكرن و مووچهى وهردگرن، مووچهیێ خانهنشینییا كرێكاران ل دووڤ پلهیێن وان دهێته دانان و دناڤبهرا 250 هزار بۆ دوو ملیۆن دیناراندایه.
ئاشكرا ژى كر، ههر كرێكارهكێ ب ڕێژهیا 35%ێ یان زێدهتر پهككهڤتى بیت، یان گیانێ خوه ژ دهستدابیت لێ ب وى مهرجى ل دهڤ حكومهتێ هاتبیته گهرهنتیكرن، دێ مووچهیێ خانهنشینییێ بۆ هێته دابینكرن.
ئاماژه ب هندێ ژى دا، نوكه تیمێن وان ل ههردوو دانێن سپێدى و ئێڤاری سهرهدانا جهێن كاركرنێ دكهن، ههر جههكێ كرێكارێن وێ ب ڕێژهیا 75% ناڤخۆ نهبن و پێگیرییێ ب ڕێنمایێن حكومهتا ههرێمێ نهكهت، دێ هێته سزادان، چهند جهـ وهكو خوارنگههـ و كومپانییان كڕێكارێن وێ ب ڕێژهیا ههتا 90%ێ ژى دبیانینه، هوشدارى ب وان جهان هاتییه دان كو دهستێ كارێ خۆمالى زێدهبكهن، پشتى ههیڤهكا دى دێ دووباره سهرهدانا وان جهان هێتهكرن، ئهگهر پێگیرى ب ڕێنمایان نهكربیت، دێ ڕهوانهى دادگههێ هێنهكرن و ل دووڤ قانوونى سهرهدهرى دگهلدا هێتهكرن.
