ئاژانسا خانی: تایبهت
پشتی نێزیكی چوار سالان كار د پڕۆژێ دهڤهرا پیشهسازی یا خوارنێ دا ل پارێزگهها دهۆكێ هاتیه ڕاوهستاندن، كێشهیا وێ هاته چارهكرن و ل نێزیك دێ دهست پێ هێته كرن كو مهزنترین پرۆژهیه ل سهر ئاستێ ههرێم و ئیراقێ.
پڕۆژێ دهڤهرا پیشهسازی یا خوارنێ ل پارێزگهها دهۆكێ مهرهم ژێ زێدهتر گرنگیدانه ب پیشهسازی و چاندنێ و ب هزارههان دهلیڤێن كاری دێ پهیدا كهت كو ژ 275 كارگههان، 229 كۆگههان، ژمارهكا هۆتێل و ریستورانتان پێكدهێت و ل سهر رووبهرێ 1432 دونهمێن ئهردی ب كۆژمێ 70 ملیار دیناران دێ هێته دروستكرن.
د.ههڤال سهدیق ئیسماعیل، رێڤهبهرێ گشتى يێ وهبهرهێنانێ ل پارێزگهها دهۆكێ تایبهت بۆ ئاژانسا خانی دیاركر: پڕۆژێ دهڤهرا پیشهسازی یا خوارنێ كو دكهڤیته كانی سپیێ ل سێمێلێ، هندهك كێشێن ئهردی ههبوون، ههتا كو هاتینه چارهكرن دهم پێڤهچوو، بهلێ خزمهتگوزاری وهكو ئاڤ و كارهب گههشتینه پڕۆژهی و نوكه چهند وهبهرهێنهران قهستا رێڤهبهریا مه كریه و ئهمێ معاملهیێن وان برێڤه دبهین داكو ل وێرێ پرۆژێن پیشهسازی دروست بكهن.
ل 20-7-2020ێ مهسرور بارزانی سهرۆكێ حكومهتا ههرێما كوردستانێ بهرێ بنیاتی بۆ پڕۆژێ دهڤهرا پیشهسازی یا خوارنێ دا ل پارێزگهها دهۆكێ دانابوو و دپهیڤهكێ دا ئاماژه ب وێ یهكێ دابوو كو كابینا نههێ كار بۆ ههمهجۆركرنا داهات و رێكێن بهرهڤ پێشبرنا كهرتێن پیشهسازی و چاندنێ دكهت.
