مهسرور بارزانی، سهرۆكێ حكومهتا ههرێما كوردستانێ ب سهرۆكایهتییا شاندەكێ حكومەتێ سەرەدانا پارێزگەها هەلەبجە كر و گۆتارەك پێشكێشكر.
د گۆتارێدا ڕاگەهاند، دەڤەرا هەلەبجە و شارەزوور و هەورامان پێگەهەكێ گرنگ و تایبەت ل كوردستانێ هەیە، چونكی مەلبەندەكێ دیار یێ ڕووناكبیری و خواندەوارییێ نە ل كوردستانێ، شانازییە كو هەلەبجە ڕێژەیا توندوتیژیێ بەرامبەر ژنان ژ هەمی پارێزگەهێن دی كێمترە.
مهسرور بارزانی، سهرۆكێ حكومهتا ههرێما كوردستانێ دیاركر، ژ ڕوویێ چاندنێ ڤە دەڤەرەكا دەولەمەندە بۆ نموونە، هنارێن هەلەبجە ناڤودەنگییەكا باش هەیە و سالا بووری ئەم شیاین هنارێن كورستانێ ب تایبەت یێن هەلەبجە بهنێرینە ژدەرڤەی وەلاتی و ئەڤرۆ ل وەلاتێن كەنداڤ و دەرڤە وەك بڕاندەكێ بەرهەمێ چاندنا كوردستانێ دهێتە نیاسین.
مهسرور بارزانی ڕاگەهاند، هەتا نوكە وەك یا پێدڤی خزمەتا هەلەبجە نەهاتیەكرن و بەرپرسێن ئەڤێ دەڤەرێ و ئەم هەمی دڤێت خۆ ب قەردارێ وەلاتییێن هەلەبجە و كەسوكارێن شەهید و ئەنفالكریێن كوردستانێ بزانین، دڤیابا ژ لایێ دارایی ڤە زێدەتر خزمەتا وەلاتییێن ئەڤێ دەڤەرێ هاتباكرن.
سهرۆكێ حكومهتا ههرێما كوردستانێ دیاركر ژی، جهێ دلگرانییێ یە چەندین سالە حكومەتا فیدرال یا عیراقێ ئامادە نینە ل دویڤ دەستووری قەرەبوویا زیانڤێككەڤتیێن دەستێ ڕژێما پێشتر یا بەعس بكەت، د دەمەكیدا كو هەلەبجە نموونەكا هەرە دیار یا تاوانێن دڕندانە یێن ڕژێما بەعسن، پێدڤی بوو هەمی بەركەڤتییێن چەكێ كیمیایی و قوربانییێن كیمیابارانێ و ئەنفالكری ب شێوەیی دارایی بهێنە قەرەبووكرن.
مهسرور بارزانی گۆت ژی، دڤێت نەهێلین جینۆسایدا وەلاتییێن هەلەبجە بهێتە ژبیركرن و نەهێلین ژبیرا بەغدا ژی بچیت و پێدڤییە مە هەمییا هەولیستەكێ توند هەبیت كو حكومەتا عیراقێ نەچاربكەین بۆ قەرەبووكرنا خێزانێن شەهیدێن هەلەبجە و هەمی كوردستانێ.
سهرۆكێ حكومهتا ههرێما كوردستانێ د گۆتارێدا دیاركر، داخواز ژ حكومەتا عیراقێ و ئەندامێن جڤاتا نوونەران دكەین كو بابەتێ پارێزگەهبوونا هەلەبجە نەهێتە پشتگوهـ هاڤێتن و وەك بابەتەكێ سیاسی بكارنەئینن، پێدڤییە د زویترین دەمدا ڕێكارێن كارگێری یێن پارێزگەهبوونا هەلەبجە بهێنە تەمامكرن و ژ لایێ جڤاتا نوونەران دەنگ ل سەر بهێتەدان و پاش بودجەیەكا تایبەت بۆ بهێتە دابینكرن.
