مەكتەبا سیاسییا پارتی دیموكراتی كوردستان ب هەلكەڤتا 33ێ سالییا سەرهلدانێ پەیامەك بەلاڤكر و ڕاگەهاند، دیرۆکا درێژخانە و پڕى سەروەرییا خەباتا گەلێ مە یێ خۆڕاگر بۆ گەهشتن ب ئارمانجێن خۆ یێن ڕەوا و بدەستخستنا مافێن گرتی، هەردەم جهێ شانازییێ بوون بۆ نەتەوە و بزاڤا مە یا ڕزگاریخواز.
هەروەسا دیاركر، ل 5ی ئادارا سالا 1991ێ ب پشكدارییا جەماوەرێ دلسۆز و وەلاتییێن تێكۆشەر و ب بڕیارا سەركردایەتییا سیاسی و هێز و لایەنێن سیاسی یێن كوردستانێ ل باژێرێ ڕانیا سەرهلدان دەستپێكر.
مەكتەبا سیاسییا پارتی ڕاگەهاند ژی، د ئەڤێ ڕۆژا ب ڕێزدا، پارتی دیموكراتی كوردستان وەك هەردەم و ل سەر هەمان پرەنسیپ و پەیاما ڕاست و دروست دووپاتییێ ل ڕێكخستنا ناڤ مالا كوردستانێ دكەت.
مەكتەبا سیاسییا پارتی گۆت: ڕەوشا سیاسییا عیراقێ بەرەڤ قووناغەكا هەستیار و ب مەترسی دچیت، ل بەردەم كۆمەكا ئاریشەیان مە پێدڤی ب هەماهەنگی و ئێك دەستییا ل سەر ئاستێ هەرێما كوردستانێ و بەردەوامییا دانوستاندنان دگەل بەغدا هەیە كو بەرەڤ چارەسەركرن و ئێكلاكرنا ئاریشەیان بچن، داكو جارەكا دی ئاریشە و قەیران دروست نەبن.
مەكتەبا سیاسییا پارتی دیموكراتی كوردستان دیار ژى كر، د ئەڤێ هەلكەڤتێدا، ب دەلیڤە دزانین كو پشتەڤانییا خۆ بۆ كرنا هەلبژارتنێن هەرێما كوردستانێ ل وی دەمێ سەرۆكێ هەرێما كوردستانێ دیاركری دیاردكەین كو دێ ل 10 خزیرانا ئەڤسالە دێ هێنە كرن، جەماوەرێ خۆ پشتڕاست دكەین، پارتی ب جددی و ڕاستگۆیانە كار بۆ كرنا هەلبژارتنێن ئازاد دكەت.
