لدویڤ ئامارێن لایەنێن پەیوەندیدار، ل هەرێما كوردستانێ هەتا ئەڤرۆ بەراورد ب هەمان ڕێكەفتا سالا بووری بارانێن زێدەتر بارینە و پەیڤدارێ ئێكەتییا جووتیاران ژی ڕاگەهاند، ژبەر بارانێن باش مەترسی ل سەر بەرهەمێ گەنمی و جەهی نەمایە.
سەبارەت بەرهەمێ دەخلودانێ ئەڤسالە هەلكەوت محەمەد، پەیڤدارێ ڕێكخراوا ئێكەتییا جووتیارێن كوردستانێ ئاشكەراكر، ” بارینا بارانێ ل دەمێ خۆ گرنگترە ژ بڕا بارانبارینێ، ئەڤسالە ب گشتی باران یا باش بوو و ئەو بارانا ل ڕۆژێن جەژنێ باری كارتێكرنەكا گەلەك باش هەبوو. ”
دیار ژی كر، ئەگەر چ بارانێن دی نەبارن ژی مەترسی ل سەر گەنمی و جەهی نەمایە، لێ ئەگەر بارانێن زۆرتر ببارن دێ بەرهەمێ گەنمی زێدەتر بیت.
ل گورەی نویترین ئامارێن ڕێڤەبەرییا چاندنا پارێزگەها دهۆكێ، ئەڤسالە ل پارێزگەهێ 740.7 ملیمەترێن بارانێ بارینە، ددەمەكی دا سالا بووری هەتا هەمان بەروار 303.4 ملیمەترێن بارانێ باریبوون.
