حكومەتا هەرێما كوردستانێ د ڕاگەهاندنەكێ دا دیاركر، ئەڤرۆ ڕۆژا دووشەمبی مەسرور بارزانی، سەرۆكێ حكومەتا هەرێمێ پێشوازی ل لژنا شەهید و قۆربانی و زیندانییێن سیاسی یا سەر ب جڤاتا نوینەرێن عیراقێ كر.
د ڕاگەهاندنا حكومەتا هەرێمێ دا هاتییە: د كۆمبوونێ دا گوتوبێژ لدۆر پێشڤەبرنا هاریكاری و هەماهەنگییێ دناڤبەرا حكومەتا هەرێمێ و حكومەتا فیدڕال دا ل پێناڤی خزمەتكرنا زێدەتر یا كەسوكارێن شەهید و ئەنفالكرییان و زیانڤێكەفتییێن دەستێ ڕژێما پێشتر یا عیراقێ هاتنەكرن.
سەرۆكێ حكومەتا هەرێمێ دۆپاتكر، ” خەلكێ كوردستانێ قۆربانییێن مەزن داینە و ڕویبڕوی دڕەندەترین هەوێن ئەنفال و كیمیابارانكرن و كۆمكوژی و وێرانكارییێ بووینە و داخازا مە ژ حكومەتا فیدڕال ئەوە كو ڕێز ل قۆربانیدانێن خەلكێ كوردستانێ و هەمی قۆربانییێن دەستێ ڕژێمێن پێشتر یێن عیراقێ بهێتەگرتن و ب شێوەیەكێ شایستە قەرەبوویا كەسوكارێن شەهیدان و زیانڤێكەفتییێن ڕژێما بەرێ بهێتەكرن.
دیار ژی كر، هەر چ یا ژ دەستێ مە بهێت بۆ خزمەتكرنا كەسوكارێن شەهید و ئەنفالكرییان دێ كەین و كێمتەرخەمییێ ناكەین.
ژلایەكێ دی ڤە سەرۆك و ئەندامێن لژنا شەهید و قۆربانی و زیندانییێن سیاسی یێن جڤاتا نوینەران، كورتییەك لدۆر كار و پڕۆژە و ئارمانجێن سەرەدانا خۆ دیاركرن و ئاماژەكر، ئارمانجا وان بهێزكرنا هەماهەنگییێ یە ل گەل وەزارەتا كاروبارێن شەهیدان و ئەنفالكرییان ل پێناڤی هەمواركرنا چەند یاسایەكان بۆ خزمەتكرن و قەرەبووكرنا كەسوكارێن شەهیدان و زیندانییێن سیاسی و زیانڤێكەفتییێن دەستێ ڕژێما پێشتر یا عیراقێ.
