پارتی دیموكراتی كوردستان ڕاگەهاند، پشتی ڕاگەهاندنا دەمێ هەلبژارتنێن خۆلا شەشێ یا پەرلەمانێ كوردستانێ ژ لایێ سەرۆكێ هەرێما كەردستانێ ڤە، دێ دەست ب ئامادەكاریان هێتە كرن بۆ پرۆسا هەلبژارتنێن پەرلەمانی.
دەقێ ڕاگەهاندنا پارتی دیموكراتی كوردستان
جەماوەرێ خۆشتڤیێ كوردستانێ….
ل سالا 2022ێ پارتی گەلەك بزاڤكرن بەری ب دووماهیك هاتنا دەمێ یاسایی یێ پەرلەمانێ كوردستانێ ڕێكارێن پێدڤی بۆ هەلبژارتنێن خۆلا شەشێ یا پەرلەمانێ كوردستانێ بهێنە كرن. بەلێ ب مخابنی ڤە گەلەك ئاستەنگ دروستبوون، ئەوان ئاستەنگان زیان گەهاندنە پرۆسا سیاسی و یاسایی یا هەرێما كوردستانێ و رەنگ ڤەدانێنت خراب بەرامبەر دەستهەلاتێ و مافێن هەرێما كوردستانێ لدویڤ خۆ ئینان. پشتی ئەڤێ بزاڤ هاتنە كرن ئەوان پێشنیارێن هەین، بۆ پەرلەمانێ هەلبژارتی بجھ بهێلین بۆ چارەسەركرنێ ب شێوەیەكێ یاسایی و رێگری ل ئەڤێ ژی هاتە كرن.
ژ بەر ڤێ چەندێ 2024-03-18 پارتی هەلویستێ خۆ بۆ جەماوەرێ تێكۆشەرێ كوردستانێ ڕاگەهاند دگەل دیاركرن و ئاماژەدان ب ئەوان كێموكاسیان و نە دادپەروەریێن كو هەبوون چ ژ مافێن پێكهاتەیان هەتا ئاریشا پەنجەمۆرێ و بزاڤا بێبەهركرنا هزاران كەسان ژ دەنگدانێ. ئەڤە و چەندین بابەتێ دی پەیوەندی ب پرۆسا هەلبژارتنان ڤە هەیە، پشتی ئەڤی هەلویستی پارتی پشكەك ژوان كێموكاسیان هاتنە چارەسەركرن و پشكەكادی د چارەسەركرنێ دا. هەرچەندە هەمی چارەسەری سەدێ سەد نەبوون بەلێ پشكەك ژ مافێن پێكهاتەیان بۆ هاتنە زڤراندن، بابەتێن دی پشكەكا باش هاتنە چارەسەكرن، ژبەرهندێ پشتی ڕاگەهاندنا دەمێ هەلبژارتنێن خۆلا شەشێ یا پەرلەمانێ كوردستان ژ لایێ سەرۆكێ هەرێما كوردستانێ ڤە، پارتی دێ دەست ب ئامادەكاریان كەت بۆ پرۆسا هەلبژارتنێن پەرلەمانی. هیڤیدارین هەلبژارتن دیموكراسیانە و پاقژ بهێنە ئەنجامدان كو ئارمانجا وان د بەرژەوەندیا وەلاتییێن كوردستانێ دابیت.
