پشتى كو حكومه‌تا هه‌رێما كوردستانێ بریارا ب هه‌ڤبه‌ستكرنا نێزیكى 38 هزار مامۆستایێن وانه‌بێژ داى، وه‌زیرێ خواندنا بلند دیاركر، ب ئه‌گه‌ره‌كێ مه‌زن مامۆستایێن وانه‌بێژ یێن سه‌ر ب خواندنا بلندڤه دێ بنه هه‌ڤبه‌ست.
ئارام محه‌مه‌د وه‌زیرێ خواندنا بلندا حكومه‌تا هه‌رێما كوردستانێ ئاشكراكر، ب دیتنا وان بریارا ب هه‌ڤبه‌ستكرنا مامۆستایێن وانه‌بێژ، وانه‌بێژێن سه‌ر ب خواندنا بلندژیڤه ب خۆڤه‌دگریت و وه‌زاره‌تا وان ب تنێ 1982 مامۆستایێن وانه‌بێژ هه‌نه و مووچه‌یێ وان ئێك ملیار و 850 ملیۆن دینارن، ئه‌ڤه‌ژى ئه‌گه‌ر هه‌ر وانه‌بێژه‌كى 600 هزار دینار بۆ بهێنه هژمارتن، له‌وما نابیته بارگرانى ل سه‌ر حكومه‌تێ.
گوت ژى: ئه‌گه‌ر حكومه‌ت 30%ێ یا داهاتێ وان، ژێ وه‌رنه‌گریت، ئه‌و بخۆ دێ شێن مووچه‌یێ مامۆستایێن وانه‌بێژ یێن سه‌ر وه‌زاره‌تا خۆڤه ده‌ن.
وه‌زیرێ خواندنا بلند ئاماژه ب هندێ دا، هنده‌ك زانكۆ هه‌نه پشكه‌كا تماما وان ژلایێ وانه‌بێژانڤه دهێته ب ڕێڤه‌برن، ئه‌و وانه‌بێژێن باوه‌رنامه‌یا به‌كالۆریۆسێ هه‌ی، بۆهه‌ر ده‌مژمێره‌كا وانه‌گوتنێ ب تنێ سێ هزار و 500 دینار بۆ دهێنه هژمارتن.
