هه‌رێما كوردستان به‌ره‌ف ئێك ژ گرنگترین پرۆسه‌یێن هه‌لبژاردنان دچیت كو دیف هه‌می خاندن و شرۆڤه‌یان ڕه‌نگه هه‌تا نها ئه‌ڤ هه‌لبژاردنه ژ هه‌لبژاردنا سالا (1992) ژی وه‌ك ئێكه‌م ئه‌زمونێ چوونا كوردستانیان بۆ سه‌ر سندوقێن ده‌نگدانێ ژی گرنگتر و كاریگه‌رتر و چاره‌نڤیسسازتر بیت، ژبه‌ر وان پێشبنیێن كو دهێنه كرن ل ڤێ قۆناغێ داب ۆ ڕه‌وشا هه‌رێما كوردستانێ.
ئه‌ڤ كاریگه‌ریا مه‌زن یا ڤێ پرۆسه‌یێ دكه‌ته ئه‌رك ل سه‌ر هه‌می ئالیێن سیاسی كو بنه‌مایه‌ك گشتگیر و نه‌گوهور هه‌بیت بۆ ڤێ پرۆسێ ئه‌وژی پارستنا ڕه‌وشا هه‌رێما كوردستانێ یه و دیركرنا مه‌ترسیانه ل سه‌ر قه‌واره‌یێ هه‌رێمێ، ئه‌ڤ چه‌نده دچیته د چارچوڤێ گوتارا به‌رێز نێچیرڤان بارزانی سه‌روكێ هه‌رێما كوردستانێ ده‌مێ ل داوی سه‌ره‌دانا خو داب ۆ ده‌ڤه‌را به‌هدینان دووپاتی ل سه‌ر بنه‌مایێ سه‌ره‌كی هزر و نه‌رینا خو كر بۆ ڕه‌وشا نوكه و گرنگیا پرۆسه‌یا هه‌لبژاردنا د كوردستانه‌ك بهێز و ئارام و دیر ژ كێشه‌یێین مه‌ترسیدار دا و ب ڤێ ڕسته‌یێ ئه‌و هزره دیار كر ده‌مێ گوتی (سه‌ركه‌فتنا هه‌لبژاردنان د سه‌ركه‌فتنا كوردستانێ دایه). وه‌ك چاڤدێر ل سه‌ر ڕه‌وشێ دشێن چه‌ند ئاماژه‌یان ل گوتنا به‌رێز سه‌رۆكێ هه‌رێمێ ده‌ربینین، ده‌ستپێكێ وه‌ك پارێزه‌رێ یاسایی و ده‌ستور سه‌رۆكێ هه‌رێمێ ئه‌ركێ خوو بجھ ئینایه و كاره‌ك جدی بۆ سه‌رئێخستنا ڤێ پرۆسه‌یێ كریه بۆ سه‌رئێخستنا نه پارته‌ك دیاركری به‌لكو بۆ بهێزكرن و سه‌ركه‌فتنا كوردستانێ، ب روون و ئاشكرا سه‌رۆكێ هه‌رێما كوردستانێ دبێژیته هه‌می ئالیێن سیاسی بیێ جوداهی كه‌س ژ هنگو سه‌رناكه‌ڤیت ئه‌گه‌ر كوردستان سه‌رنه‌كه‌ڤیت، ئانكو چ كاره‌كێوه‌سا ئه‌نجام نه‌ده‌ن كو ب بیته ئه‌گه‌رێ سه‌رنه‌كه‌فتنا كوردستانێ د ڤێ پرۆسه‌یێ دا، هه‌ر ل ڤێ گۆتنێ دا دیار دبیت كو سه‌رۆكێ هه‌رێمێ پتر ڕه‌وشا شه‌رێ په‌كه‌كێ و توركیا و گه‌فێن سه‌ر سنۆرێ هه‌رێمی ب هه‌می ئالیه‌كێ ڤه خاندینه و هه‌بوونا هه‌ر كێشه‌یه‌كێ واتا سه‌رنه‌كه‌فتنا كوردستانێ و ل ده‌ست چوونا قه‌واره‌یێ هه‌رێما كوردستانێ، هه‌روه‌سا ئه‌و ئاماژه‌یه ژی دیار دبیت كو به‌غدا و ئالیێین سیاسیێن شیعی و سوننی ڤه به‌رده‌وامن ل پیلانگیرێت خو دژی هه‌رێمی و ب سه‌رنه‌كه‌فتنا ڤێ پرۆسێ واتا سه‌ركه‌فتنا وان پیلانان دژی هه‌رێما كوردستانێ، هه‌ر ل ڤێ ڕسته‌یێ دا دیار دبیت كو سه‌رۆكێ هه‌رێما كوردستانێ هه‌ست ب وێ چه‌ندێ كریه كو هێشتا سازیێن هه‌رێما كوردستانێ مه‌ترسیا پارتێن ده‌ستهه‌لاتدار هه‌یه و ل ده‌مێ سه‌رنه‌كه‌فتنا ڤێ پرۆسه‌یێ واتا ژ نافچوون و نقومبوونا گه‌میا كوردستانێ بێ جوداهی.
ل داویێ و بێ ئێك و دوو هه‌می ئالیێن سیاسی وێ چه‌ندێ باش دزانن كو ئه‌ڤ هه‌لبژاردن زۆر گرنگن و وه‌كی پرۆسه‌یێن دیتر نینن ژبه‌ر وان گوهۆرینێن ل یاسایا هه‌لبژاردنان هاتیه‌كرن، له‌وما پێتڤیه ژبوو سه‌ركه‌فتنا هه‌رێما كوردستانێ و پاراستنا ئێمناهیا وه‌لاتی و پارێزگاری كرن ژ قه‌واره‌یێ هه‌رێما كوردستانێ یێ ده‌ستوری و یاسایی فه‌ره بانگه‌شه‌یه‌ك ئارام ب ڕێڤه‌بچیت بۆ سه‌رئێخستنا ڤێ پروسه‌یێ و سه‌ركه‌فتنا كوردستانێ.
