واشنتون بۆ بەغدا: ئاریشه‌یێن کۆمپانییێن ئەمریكی یێن پەتڕۆلێ ل هەرێمێ چارەسەربكەن

مایکل والتز، شیرەتكارێ ئاسایشا نشتیمانییا ئەمریکا د پۆستەكیدا ل تۆڕا جڤاكییا ئێکس ڕاگەهاند، دوهی ڕۆژا ئێكشەمبی ئەو ب تەلەفۆنێ دگەل محەمەد شياع سوودانی، سەرۆکوەزیرێن عیراقێ ئاخڤتییە و داخواز ژێ كریە دگەل هەرێما کوردستانێ کار بۆ چارەسەرکرنا ئاریشەیێن گرێبەستێن وان کۆمپانییێن ئەمریکی بکەت، یێن ل كێلگەهێن هەرێمێ کاردکەن و قەرزێن وان بدەن.

ئیدارا دۆنالد ترەمپی بەردەوام عیراقێ هانددەت دەستپێکرنا هنارتنا پەتڕۆلا هەرێمێ بلەز بێخیت داكو پەتڕۆلا زێدەتر بگەهیتە بازاڕێن جیهانێ و بهایێ وێ بهێتە خوار، دهەمان دەم ژی دا عیراق پشتبەستنێ ل سەر پەتڕۆلا ئیرانێ کێمبکەت.