مەسرور بارزانی: دخوازین ب زووترین دەم هەلەبجە ببیتە پارێزگەهـ

دەقێ پەیاما مەسرور بارزانی:

د سالڤەگەرا کیمیابارانکرنا باژێڕێ هەلەبجە و دەوروبەرێن وێدا، ئەڤرۆ ب ڕێزڤە یادا شەهیدێن ڤێ كۆمەلكوژییا ڕژێما پێشتر یا عیراقێ دكەین و هەردەم د دلێ مە دانە، مە ڕێزەكا مەزن بۆ قۆربانیدانێن خەلكێ نیشتیمانپەروەر و تێكۆشەر یێ هەلەبجە، ب تایبەتی بریندارێن وێ كارەساتێ و كەسوكارێن سەربلند یێن شەهیدان هەنە.

هەرچەندە پشكەك ژ بەرپرسیار و ئەنجامدەرێن سەرەکییێن ڤێ تاوانێ ب سزایێن خۆ گەهشتن، لێ سەرەڕای دەربازبوونا 37 سالان ب سەر ڤێ كارەساتا مەزن، هێشتا ژان و برینێن ڤێ تاوانێ سارێژ نەبووینە، لەوما ئەركێ مە هەموویانە، کار ژ پێخەمەت زێدەتر دانەنیاسینا جینۆسایدا هەلەبجە و ئەنفالێ و هەموو تاوانێن دی، کو بەرامبەر گەلێ کوردستانێ هاتینە كرن بکەین و خزمەتەكا زێدەتر یا بنەمال و کەسوکارێن شەهیدان و قۆربانییێن ڤان تاوانان بکەین.

حکومەتا هەرێما کوردستانێ، ب ئەرکێ سەرەکییێ خۆ دزانیت خزمەتەكا ژ هەژی یا خەلكێ هەلەبجە و قۆربانییێن دی یێن جینۆسایدا گەلێ کوردستانێ بکەت، د سالێن بووری ژیدا، چەندین پرۆژەیێن خزمەتگوزاری د بوارێن جودا دا ل پارێزگەها هەلەبجە هاتینە ب جهئینان، بەلێ دزانین ژی هەلەبجە پێدڤی ب خزمەتكرنا زێدەترە، د ڤی بواریدا، ئاكنجییێن بەڕێز و قۆربانیدەرێن پارێزگەها هەلەبجە پشتڕاست دكەین كو ل داهاتی ژی، دێ زێدەتر و باشتر خزمەتا وێ دەڤەرێ كەین.

جهێ داخێ یە، حکومەتا فیدرال هەتا نوكە، بەرپرسیارەتییا دەستووری و یاساییا خۆ بۆ قەرەبووکرنا بنەمال و کەسوکار و قۆربانی و شەهیدێن هەلەبجە و ئەنفالکریان بجهنەئینایە، تەنانەت هەتا نوكە ژی، جڤاتا نوونەران پرۆسا ب پارێزگەهبوونا هەلەبجە پەسەند نەکرییە، لەوما داخواز دكەین ئێدی كێم خەمی بەرامبەر قۆربانیدانێن هەلەبجە نەهێتە كرن و ب شێوەیەكێ ژ هەژی، بهێنە قەرەبووكرن و ب پارێزگەهبوونا وێ ژی د زووترین دەم دا بهێتە پەسەند كرن.

سلاڤ ل گیانێ پاقژ یێ شەهیدێن هەلەبجە و هەموو شەهیدێن کوردستانێ.