<h3>نێچیرڤان بارزانی، سەرۆكێ هەرێما كوردستانێ د هەژمارا خۆ یا تۆڕا جڤاكییا ئێكسدا، پەیامەك ب هەلكەفتا سالڤەگەرا کیمیابارانکرنا باژێڕێ هەلەبجە بەلاڤكر. دەقێ پەیاما نێچیرڤان بارزانی: د یادا پڕ ئازار یا كارەساتا كیمیابارانكرنا هەلەبجەدا، سەرێ ڕێز و نەوازەشێ بۆ گیانێ زێدەتر ژ پێنج هزار شەهیدێن هەلەبجە د چەمینین و ب ڕێزڤە یادا هەموو شەهیدێن كوردستانێ دكەین یێن ژ پێخەمەت ئازادییێ گیانێ خۆ كریە قۆربان، سلاڤ و ڕێز بۆ بنەمال و كەسوكارێن سەربلند یێن شەهید و برینداران و قۆربانییان كو هەتا ئەڤرۆ ژی هێشتا ب دەست ئاسەوارێن وێ تاوانا تڕسناك، ئازاران دبینن. كیمیابارانكرنا هه‌له‌بجه نە ب تنێ تاوانەك بوو، به‌لكو پشكەكا خەمناك بوو ژ زنجیره‌یه‌كا تاوان و جینۆسایدان كو ئارمانجا وان نەهێلانا گەلێ كوردستانێ بوو، گه‌لەكی كو تاوانا وان ب تنێ داخواز كرنا مافێن خۆ یێن ڕەوا بوو بۆ ژیان و ئازادییێ، هه‌له‌بجه بوویه هێمایه‌كێ جیهانی بۆ سته‌ملێكرنا گەلێ مە و شاهدحالەك بۆ دڕنده‌یيیا وان تاوانێن دژی مە هاتینە كرن، ئه‌گه‌ر دادپه‌روه‌رييه‌كا ڕاسته‌قینه هه‌بایه، ئه‌ڤ كاره‌ساته ب تنێ به‌س بوو بۆ دانپێدانێ ب هه‌موو مافێن ڕه‌وا یێن گه‌لێ كوردستانێ. د ڤێ یادێ دا، جارەكا دی دووپات دكەین پێدڤییە قه‌ره‌بوو‌یا خه‌لكێ هه‌له‌بجه و هه‌موو قۆربانيیێن جینۆساید و ئه‌نفالێ بهێتە كرن و د هه‌موو بواراندا باشترین خزمه‌تگوزاری پێشكێشی وان بهێتە كرن، ئه‌ركێ حكومه‌تا عیراقێیە به‌رپرسیاره‌تيیا یاسایی و ئه‌خلاقيیا خۆ به‌رامبه‌ر قۆربانیيان و هه‌موو پابه‌ندییێن دەرهەق هه‌له‌بجه و ئاكنجییێن وێ بجهبینیت، هه‌روه‌سا هه‌موو ڕێكارێن ب پارێزگەهبوونا هه‌له‌بجه تمام بكەت، پێدڤییە كۆمه‌لگەها نێڤدەولەتی ژی ل سەر بزاڤێن خۆ بۆ پشتڕاستبوونێ ژ دووبارەنەبوونا ڤان جۆرە تاوانان ل هەر جهەكێ جیهانێ، به‌رده‌وام بیت. هه‌رێما كوردستانێ ئەڤرۆ ب قه‌واره‌یێ ده‌ستووری و فیدرالی و هەموو دەستكەفتێن خۆ ڤە، به‌رهه‌مێ خه‌بات و قۆربانیدانا شه‌هیدایه، ئه‌ركێ مە هه‌موویانه ب ئێكڕێزی و ته‌بايى بپارێزین، وه‌فاداری بۆ قۆربانیيێن هه‌له‌بجه و هه‌موو شه‌هیدێن كوردستانێ، هه‌روه‌سا پشتڕاستبوون ژ داهاتوويه‌كێ باشتر بۆ هه‌مووان، دێ ب موكمكرنا پێكه‌ڤه‌يى و لێكتێگەهشتن و هاريكارییێ ژ پێخەمەت پاراستنا مافێن گه‌لێ كوردستانێ بیت. سلاڤ بۆ گیانێ شه‌هیدان.</h3>
