ئەڤرۆ نێچیرڤان بارزانی، سەرۆكێ هەرێما كوردستانێ ب هەلكەفتا ڕۆژا جیهانییا كرێكاران د هەژمارا خۆ یا تۆڕا جڤاكییا ئێكسدا، پەیامەك بەلاڤكر.
دەقێ پەیاما نێچیرڤان بارزانی:
” ب هەلكەفتا ئێكی ئەیارێ، جەژنا جيهانيیا کرێکاران، گەرمترین پیرۆزباهییان پێشکێشی گشت کرێکارێن کوردستانێ، عیراقێ و جیهانێ و ڕێكخراوێن وان دکەم. ڕه‌نج و ماندیبوونا وان ل بنیاتنان و ئاڤەدانکرن و پشكدارییا وان یا كارا و بنەڕەت د پێشخستن و گەشەسەندنا وەلاتیدا، بلند دنرخینم.
دووپاتییێ ل سەر پشتەڤانییا تەمام یا مافێن کرێکاران و داخوازێن وان یێن ڕەوا ل هەرێما کوردستانێ دکەین، هه‌روه‌سا پێداگرییێ ل سەر پێويستيیا دابینکرنا ژینگەهەکا کاری یا ئارام و بدەستڤەئینانا دادپەروەرییێ ل دەرفەتێن کاری و ڕێکخستنا پەیوەنديیان دناڤبەرا كرێكاران و خۆدانكاران دا دکەین ل سەر بنەمایەکی کو شکۆیێ کرێکاران بپارێزیت و پشتڕاستییا ژیان و ژیارا وان، مسۆگه‌ر بکەت.
هه‌ر ل ڤێ هەلكەفتێ، ب ڕێزڤه هه‌موو وان كرێكاران ل بيردئینین یێن ل دەمێ كاركرنێ گیانێ خۆ ژدەستداین و سلاڤان بۆ خێزان و كەسوكارێن وان دهنێرین. دووپات د‌كه‌ين كو لایەنێن پەیوەندیدار پێدڤییە چاڤدێريیا خێزانێن وان بکەن و هه‌موو پشتەڤانی و هاریكارییا پێدڤی بۆ بهێتە دابینكرن. ”
هیزییا بهێنڤەدانەكا ئارام بۆ هەموو کرێکاران و سەركەفتنێ د بزاڤ و خەباتا وان دا بۆ ده‌سته‌به‌ركرنا مافێن وان، دخوازم. “
