زاگروس فەتاح:
ژ دەستپێکا کابینەیا نەهێ، هەر دەم مە ژ سەرۆکوەزیران کاک مەسرور بارزانی بهیستییە، کو کابینە گرنگیەکا زۆر ددەتە هەمەجۆریکرنا ئابووری و ئارمانجا وی ئەوە کو کوردستان د وارێن جودا جودا دا گەشەیە بکەت و بتنێ پشت ب نەفتێ و ئێک ژێدەر نە گرێدەت. لڤێرە ژ بۆ خەلکێ کوردستانێ گرنگە کو بتەمامی بۆ وان ڕۆهن بیت، ئایا ئەڤە بتنێ درووشم بوو، یان کابینەیا نەهێ ب دروستی و زانایانە سۆزێن خۆ بجهئیناینە و هەرێما کوردستانێ برە قۆناغەکا دی؟
بۆ بەرسڤا ڤێ پرسیارێ، بجهئینانا ب دەهان پرۆژەیێن گرنگ د وارێن ڕێک و پران دا و ووزە و کارەب و چاندن و دروستکرنا سایلۆ… هتد، سەلمێنەرێن وێ یەکێ نە کو کابینەیا نەهێ کابینەیا بەرهەنگاربوونا قەیرانان و بجهئینانا پرۆژەیێن ستراتیژی بوو.
د ئەڤێڤێ نڤێسینا من دا، مەرەما من نە ئەوە، دەستکەڤت و پرۆژەیێن کابینەیا نەهێ ڕێز بکەم و ئاماژەیێ پێ بدەم، چونکی خەلکێ کوردستانێ شاهد و گەواهیدەرێن دەستکەڤت و خزمەتێن کابینەیێنە و هەروەسا شاهدێن هەمی وان قەیران و بەربەستێن ناڤخۆیی و عیراقی و هەرێمی نە کو کابینەیا نەهێ شیا بەرهنگاری وان ببیت.
چەند ڕۆژێن بەری نوکە و ب دیاریکری ل 12ـی ئەیارا 2025ـێ، سەرۆکوەزیران کاک مەسرور بارزانی، ب فەرمی (پرۆژەیێ چیمەنتۆ و کارەبا دابین) ڕاگەهاند، کو ئێکە ژ گرنگترین پرۆژەیێن پیشەسازی یێن ستراتیژی لسەر ئاستێ هەرێما کوردستانێ و عیراقێ.
مەرەما من ئەوە ژ چەند ڕوویانڤە لسەر ئەڤی پرۆژەیێ ستراتیژی یێ پیشەسازی یێ گرنگ باخڤم:
ئێك: ئاڤاکرنا پرۆژەیێن پیشەسازی یێن مەزن ل کوردستانێ و عیراقێ کارەکێ ب زەحمەت و دژوارە.
لایێ هەمییان یا دیارە، وەلاتێن پێشکەڤتی یێن ئۆرۆپا و هندەک ژ وەلاتێن ڕۆژهەلاتێ ئاسیا، پێشەنگ و پێشبرکیکارێن وارێ پیشەسازینە و وەلاتێن ئەڤێ دەڤەرێ و ب تایبەتی عیراق و هەڤشێوەیێن وێ د وارێ پیشەسازیدا پاشکەڤتینە و ژ کاروانی پاشڤە ماینە، ئەڤێ چەندێ وەکریە کو پێشکەڤتن د کەرتێ پیشەسازیدا ل ئەڤێ دەڤەرێ، کارەکێ دژوار بیت، لێ خۆشبەختانە کابینەیا نەهێ د ئەڤی واریدا دەستبەردار نەبوو، ئەڤ پرۆژەیێ ستراتیژی یێ گرنگ ژی کرە سەر خەرمانێ دەستکەڤت و پێشکەڤتنێن خۆ بۆ کوردستانێ.
ئەڤ پرۆژە؛ ژبلی ڕەخساندنا (1200) هزار و دوو سەد دەلیڤێن کاری یێن نوو، ڕۆژانە (6300) شەش هزار و سێ سەد تەنێن چیمەنتۆ، بەرهەم دئینیت.
دوو: ڕاکێشانا وەبەرئینانا بیانی بۆ هەرێما کوردستانێ
(پرۆژەیێ کارگەها چیمەنتۆ و کارەبا دابین)، ژ لایێ کۆمپانییا (پاوەر چاینا) کو کۆمپانیەکا هەرە مەزن یا نێڤدەولەتییە، ب هەڤپشکی دگەل کۆمپانییا (دابین) کو کۆمپانیەکا خۆمالییە، ب بهایێ زێدەتر ژ 200 ملیۆن دۆلاران هاتییە بجهئینان.
هاتنا کۆمپانیەکا مەزن یا نێڤدەولەتی بۆ وەبەرئینانەکا وەسا مەزن ل هەولێرێ، سەلمێنەرێ وێ یەکێ یە کو پشتڕاستی و باوەریەكا نێڤدەولەتی یا مەزن هەیە بۆ سەقامگیریا هەولێرێ و هەرێما کوردستانێ، ئاخر ئەڤ وەبەرئینانا کو ڤێ کۆمپانییێ د ئەڤی پرۆژەیدا کری ب سالەکێ و دوو سالان كوژمێ پرۆژەیێ ناکەڤیتە دەست و پشتی چەندین سالان کارکرن ل هەرێما کوردستانێ دشێت وی پارەی وەرگریتەڤە، ئەڤە ژی نیشانا وێ یەکێ یە کو وەلات و کۆمپانیێن مەزن یێن جیهانێ، مەرەما وان ئەوە كو ل کوردستانێ ستراتیژییانە و درێژخایەن کاری تێدا بکەن، باوەریا وان ب حوکمرانییا نوکە یا کوردستانێ و سۆز و بەرنامێن سەرۆکوەزیران هەیە و دزانن کو کوردستان د گەشەکرنا بەردەوامدایە و چاڤێ وان ل وێ یەکێ یە کو هەڤپشکییێ د ئەوێ گەشەکرنێدا بکەن.
بێگۆمان ڕۆلێ کۆمپانیا (دابین) ژی وەک کۆمپانیەکا کوردی یا خۆمالی، د ئەڤێ وەبەرهێنانا گرنگدا، گەلەک بەرچاڤ و گرنگە و جهێ دەستخۆشی و سوپاسداریەكا زۆرە.
