سەرەدانا سەرۆکوەزیرێن کوردستانێ بۆ ئەمریکا د ڤێ حەفتییێدا و پێشوازییا گەرما بەرپرسێن بلندێن ڤی وەلاتی و ئیمزاکرنا پەیمانێن گرنگ د بیاڤێ وزەیێدا دگەل کۆمپانیێن ئەمریکی، ب گرنگی ڤە ل میدیا ئەمریکی و جیهانی هاتە بەحسكرن. ئەڤ سەرەدانە و ڕێرەوێ دیپلۆماسی یێ سەرۆکوەزیرێن کوردستانێ و ئیمزاکرنا ئەڤان پەیمانان و ئینانە سەر هێڵێ یا بەرپرسێن بلندێن ئەمریکا بۆ پشتەڤانیكرنێ ل هەرێما کوردستانێ، پێگەهێ هەرێما کوردستانێ ل عیراقێ و دەڤەرێ دا ب هێز و پشت و پەنا و کاریگەرتر کر و ئاسۆیا گەشانەڤە و بازدانەکا گرنگ یا ڕەوشا ئابووری یا هەرێمێ دەرئێخست.
ئەمریكا ڕاستە بەردەوام بەحس ل ئاسایش و ئارامی یا عیراقێ و ئێكگرتنا ڤی وەلاتی دکەت، بەلێ بەردەوام ژی دووبارە دکەتەڤە کو دگەل عیراقەکا سەقامگیر و ئێكگرتوو دا ، پێدڤییە هەرێمەکا ب هێز و سەقامگیر و فیدرالی هەبیت، واتە مەرجێ ئەمریکا بۆ عیراقا سەقامگیر و ئێكگرتوو ، هەرێما کوردستانا ب هێز و سەقامگیرە.
د شرۆڤەکرن و پەیامێن دویڤ پەیمانا وزەیێ یا دناڤبەرا هەرێما کوردستانێ و کۆمپانیێن ئەمریکیدا جارەکا دی بەرپرسێن ئەمریكا پێداگری یا خۆ دووبارە کرەڤە، کو مەبەستا وان پشتەڤانییە ژ هەرێما کوردستانێ یا سەقامگیر و ب هێز و پشتەڤانییا ئابووری یا وێ. بێگومان ئەڤە ژی یا بێ ئەگەر نینە، بەلکو پەیوەندی ب سیاسەتا دروستا حوكمرانیا هەرێما كوردستانێڤە هەیە.
ئەوێن کو کێمەك شارەزاییا ئابووری هەی دزانن كو گرێبەستەكا هوسا گرنگا ئابووری د بیاڤێ وزەیێدا دگەل کۆمپانیێن ئەمریكیدا پێنگاڤەكا گرنگ یا بەرهەمئینانا وزەیێ و گەشەپێدان و باشترکرنا ڕەوشا کارەبێ ل هەرێما کوردستانێ و عیراقێدا ژ لایەکێڤە، ژ لایەكێ دیڤە ژی ڤان گرێبەستان کاریگەری یا ئابووری و سیاسی یا ڕاستەوخۆ ژی هەیە و دشێت ژێدەرێ داهاتێ یێن نوی بۆ هەرێمێ و عیراقێ پەیدا بكەت و هاریكاریا سەقامگیری یا دەڤەرێ بدەت.
ئەدایا سیاسی و دیپلۆماسیانەیا سەرۆکوەزیران دگەل وه‌لاتێن جیهانێ ب گشتی و ئەمریكا ب تایبەتی ب ڤی ئاستێ بلند، هەڤپەیمانەتی یا دناڤبەرا کوردستانێ و ئەمریكا بریە د قۆناغەکا نویدا، کو بۆ هەردوو لایان ژ ڕوویێ سیاسی و ئابووریڤە یا گرنگە و ڕەهەندەكێ ستراتیژییێ خۆ یێ هەی.
بزاڤا بێ راوەستیان و بەردەوام بۆ ب هێزکرنا پێگەهێ کورد و هەرێما کوردستانێ ل دەڤەرێ و جیهانێدا، ئارمانج و دیدگەهـ و ستراتیژی یا درێژخایەنا پارتی دیموکراتییا کوردستانێ و سەرۆك (مەسعود بارزانی)یە. ئەڤ بەرنامە و ئەجێندایا پارتی دوژمنێن کورد و دوژمنێن پارتی ژی تورە و شەپرزە كرینە! ئەڤە ئەجێندایەکا نەتەوەیییە، لەوڕا پارتی د زەحمەترین قۆناغ و ڕه‌وشاندا دەستبەردارنەبوویە، ئەڤا ئەم دبینین پشتی سەرهلدانا مەزنا ئادارا 1991ـێ و دویڤدا ب شێوازێن جۆراوجۆر و د ئاستێن جودادا دەرئەنجام هەبوویە، و بەردەوام ژی ئەڤ دەرئەنجامە دێ زێدەتر و پڕبەرهەمتر بیت.
