ئەگەر ئەم خواندنەکێ بۆ ڕەوشا ڕۆژهەلاتا ناڤین بکەین چ ئەنجامەکێ گەشبین ب دەست مە ناکەڤیت، هەمی ئاراستەیێن شروڤەکرنا ڕەوشا ڕۆژهەلاتا ناڤین بەرەڤ ئەنجامەکی دچن کو شەڕەکێ دوومدرێژ و ڕەوشەکا ئالۆز و پڕی ئاریشە دێ ب سەر ڕۆژهەلاتا ناڤین داهێت، ڕۆژهەلاتا ناڤین یا دابەشبووی لسەر دوو جەمسەرێن هێزێ، ئیران وەک جەمسەرەکێ هێزێ و خودانا ئیمپراتۆریەت و شارستانیەتا ب هزاران سالان پشتی سیستەمێ دەولەت و نەتەوەیا مودێرن ل جیهانێ بەلاڤبووی، هێزا ئیرانێ هاتە سنووردارکرن دناڤبەرا چار سنووراندا ،تا کو ئیران بمینیت وەک هێزەکا سەرەکی لدەڤەرێ و خودان هەژموون، ژ بۆ پاراستنا خۆ پەنایێ دبەتە بەر دروستکرن و بدەستڤەئینانا چەکێ ئەتۆمی، هەروەسا ئەمریکا و ئیسڕائیل وەک دوو هێزێن خودان بەرژەوەندییێن هەڤپشک و هەڤپەیمان، دروستکرنا چەکێ ئەتۆمی ژلایێ ئیرانێڤە ب مەزنترین گەف و مەترسی دبینن بۆ سەر بەرژەوەندی و هەژموونا خۆ ل ڕۆژهەلاتا ناڤین، ئەڤە مەزنترین ئەگەرێ ئەڤی شەڕییە کو ئەمریکا و ئیسڕائیل هەمی بزاڤان دکەن ئیران چەکێ ئەتۆمی ب دەستخۆڤە نە ئینیت.
پسیارا سەرەکی ل ڤێرێ ئەوە ئەگەر ئەمریکا پشکداریێ د شەڕیدا بکەت دێ ئەنجام چ بن ؟؟
ئەگەر ئەمریکا پشکداریێ د شەڕیدا بکەت سێ رێک و گریمانە یێل پێشیا ئەمریکا بۆ پشکداربوونێ د ئەڤی شەڕیدا .
١-ئەمریکا راستەوخۆ پشکداربیت و بنگەهێن چەکێ ئەتۆمی یێن ئیرانێ ژناڤ ببەت، هوسا دێ بیتە دوژمنەکێ سەرەکی و بەردەوام بۆ ڕژێما ئیرانێ هەمی بنگەهێن وێ یێن لەشکەری و بەرژەوەندیێن وێ دێ بنە ئارمانجا ڕژێما ئیرانێ، ئیران ژ بۆ تۆلڤەکرنێ هەر دەولەتەکا دوژمنێ ئەمریکا بیت دێ ئامادەبیت رێککەڤتنێ دگەل بکەت بۆ ژناڤبرنا بەرژەوەندیێن ئەمریکا ل ڕۆژهەلاتا ناڤین، مەترسی و گەفێن ئیرانێ دێ بەردەوامبن لسەر ئەمریکا، دێ ئەمریکا کەڤیتە د شەڕەکێ دوومدرێژدا دگەل ئیرانێ، ب ئەڤێ رێکێ ئەمریکا چ ئەنجامێن باش بدەستڤە نائینیت و چ ژ مەترسیا ئیرانێ کێم ناکەت بەلکو دێ مەترسییێ و شەڕی بەرفرەهـتر لێکەت .
٢-پێدڤییە ئەمریکا ڕاستەوخۆ پشکداریێ د شەڕیدا بکەت لێ نەبتنێ بنگەهێن ئیرانێ یێن چەکێ ئەتۆمی ژناڤ ببەت بەلکو رژێما ئیرانێ ژی ب هەلوەشینیت، حکومەتەکا دیموکراسی ل ئیرانێ ب دامەزرینیت و سیسیتەمەکێ حوکمڕانیێ یێ لاواز وەکی یێ عیراقێ بدانیت، کو پشتی ب دووماهی هاتنا شەڕی ئەو شیان نەبن ببیتە مەترسی و هێرشا بکەتە سەر بەرژەوەندیێن ئەمریکا ل دەڤەرێ، ئەڤ چەندە ژی یا ب زەحمەتە ژبەرکو ئیران دگەل عیراقێ گەلەک یا جیاوازە ژ ڕویێ جوگرافی و ئایدولۆژی و نەتەوەی، وەلاتیێ ئیرانێ وەلاتیەکێ نەتەوە پەروەرە، ئەگەر ڕژێم بکەڤیت ژی هێشتا ب ملیۆنان دوژمنێن ئەمریکا دێ لناڤ ئیرانێ مینن و ئەگەر دەرفەت بۆ دروستبوو دێ هێنە سەر دەستهەلاتێ و دێ دوژمنایەتییا ئەمریکا کەن ئانکو ئەمریکا و ئیران دێ بنە دوژمنێن ئەبەدی.
٣-پێدڤییە ئەمریکا ب شێوەیەکێ نەراستەوخۆ ب نەهێنی پشکداریێ د شەڕیدا بکەت و چ بەلگەیان بۆ ئیرانێ نەهێلیت کو پشکداری یا د شەڕیدا کری، بۆ ئەڤێ چەندێ ژی، چەکێ گران بدەتە ئیسڕائیلێ بۆ ژناڤبرنا بنگەهێن ئەتۆمی یێن ئیرانێ، ئەڤ رێیە ژی یا ب زەحمەتە ژبەر کو ئیرانێ زانیاری یێن هەین کو ئەمریکا ب تنێ شیان و ئەو جۆرێ چەکی یێ هەی کو بنگەهێن چەکێ ئەتۆمی یێن ئیرانێ ژناڤ ببەت، ئیرانێ گەف یێن کرین ئەگەر ئەمریکا چەکی ب دەتە ئیسڕائیلێ.
پسیارەکا دی لڤێرێ ئەوە ئەگەر ئەمریکا پشکداری د شەڕی دا نەکەت دێ چ روودەت؟
ئیسڕائیل وەکو تاکە هێزا ئەتۆمی ل ڕۆژهەلاتا ناڤین و دژمنێ سەرەکی یێ ئیرانێ دێ بەردەوام بیت لسەر شەڕی و دێ هەمی بزاڤان کەت ئیران نەبیتە خودان چەکێ ئەتۆمی، لێ بێی ئەمریکا ئەڤ شەڕە دێ یێ ب زەحمەت بیت و جۆرە بالانسەکێ هێزێ دێ دناڤبەرا ئیسڕائیلێ و ئیرانێدا دروست بیت ژبەر کو هەر دوو دەولەت خودان ئیمکانیات و چەکێن گرانن و شەڕ دێ دناڤبەرا وان دا بۆ دەمەکێ درێژ ڤەکێشیت، ئیران دێ مفای ژ ئەڤی دەمێ درێژ بینیت و ئەگەرێن هەین بگەهیتە ئارمانجا خۆ و چەکێ ئەتۆمی ب دەستخۆڤە بینیت، دا کو ئەڤ چەندە روونەدەت دبیت ئیسڕائیل هەمی رێکا بکاربینیت د ئەڤی شەڕیدا، وەکی چەکێن قەدەغە و کۆمکوژی یان نە دوویرە چەکێ ئەتۆمی بکاربینیت ئەگەر مەترسیا ژناڤچوونێ کەڤتە سەر ئیسڕائیلێ،ئەڤ هەمی ئەگەرێن مە شروڤەکرین هۆسا دیاردکەن کو دێ ڕەوشا ڕۆژهەلاتا ناڤین بەرەڤ شەڕەکێ دوومدرێژ و وێرانکار چیت.
خودێ کوردستانا مە ب پارێزیت.
