<h3>ئەندامەكا پەرلەمانێ عیراقێ ڕاگەهاند، بنگەهێ لژنەیا مادەیێ 140 ل نەینەوا هاتە دانان، دێ قەرەبوویا وان خێزانان كەت، یێن ل سەر دەمێ ڕژێما بەعس ژ ئاخ و مالێن خۆ هاتینە دوورخستن (تەعریبكرن )، عەرەب ل شوونا وان هاتینە دانان. كاڤین شێخ سەعید ئەنداما پەرلەمانێ عیراقێ بۆ ئاژانسا خانی دیاركر، هەر خێزانەكا زەرەرمەند، دێ 10 ملیۆن دیناران و پارچەكا ئەردی وەرگریت، لێ ل دەستپێكێ دڤێت مامەلەیێن وەرگرتنا كوژمێ دیاركری ب ڕێڤەببەن پاشان یێن پارچەیا ئەردی. ئاماژە ب هندێ دا، هندەك كەسان مامەلیێن 10 ملیۆن دیناران یێن تمامكرین و پارە وەرنەگرتینە، ئەو كەسەك دڤێت جارەكا دی مامەلەیان تمامبكەن، ئەو كەسێن پارە وەرگرتین، دڤێت مامەلەیێن پارچەیا ئەردی تمامبكەت، هەروەسا هندەك كەسان مامەلە تمامكربوون و چەكێ بانكی ژی بۆ دەركەڤتبوو، دڤێت ئەوژی چەكێ خۆ یێ بانكی نوو بكەن، ئەو كەسێن هەتا نوكە چ مامەلە بۆ قەرەبووكرنێ ب ڕێڤەنەبرین، دڤێت دەست ب دروستكرنا وان بكەن. ئاشكرا ژی كر، 70 هزار خێزان ل مووسل و دەوروبەرێن وێ هەنە دێ مفای ژ ڤی پارەی وەرگرن، 100 ملیار دینار گەهشتینە و هەر پارێزگەهەكا مادەیێ 140 لێ هەبیت، دێ مفای ژ وی پارەی وەرگریت.</h3>
