فرۆشیارەکێ دەرمانێن سروشتی دیارکر، ل دەمێن بووری بازارێ دەرمانێن سروشتی ب رێیا ئۆنلاین گەرم بوویە و نۆشدارەک ژی دبێژیت: نابیت ئەڤ دەرمانە بێی نۆشدارێن بسپۆر بھێنە بکارئینان.
محەمەد قاسم، فرۆشیارەکێ دەرمانێن سروشتی یە بۆ خانی نیوز دیارکر، ل دەمێن بووری ھژمارەکا کەسێن نە بسپۆر ھندەک پەیجێن تۆرێن جڤاکی دروستکرینە و دەرمانێن سروشتی یێن سەختە دفرۆشن.
گۆت ژی، ئەو دەرمانێن ئەو ب رێیا ئۆنلاین دفرۆشن د قەدەغەنە و رێ ناھێتە دان ئەو دەرمانە بھێنە فرۆشتن، ئەو کەسێن دەرمانێن سروشتی دفرۆشن دڤێت شارەزایی د وی واری دا ھەبیت دا بزانیت دێ خەلک چاوا بکارئینن.
شرین رەمەزان، ئێک ژ وان ژنایە یێن ئەو دەرمانە ب کارئینای بۆ خانی نیوز گۆت: وێ ب رێیا وان پەیجان دەرمانێن سروشتی یێت کێمکرنا سەنگێ داخوازکرن، لێ ڤان دەرمانان کارتێکرنەکا خراب ل سەر ساخلەمییا وێ کر و پشتی سەرەدانا نۆشداری کری گۆت: ئەو دەرمان قەدەغەنە و نابیت بھێنە بکارئینان.
نۆدار سەلاحەددین محەمەد عەلی، سەرۆکێ لقا دھۆک یا سەندیکا دەرمانسازێن کوردستانێ بۆ خانی نیوز گۆت، دەرمانێن سروشتی ھەر دەرمانن و کارتێکرنێ ل سەر سیستەمێ لەشێ مرۆڤی دکەن و نابیت بێی کەسانێن بسپور بھێنە فرۆشتن چ ب ئۆنلاین یان راستەوخۆ.
دیار ژی کر، وەک سەندیکا وان نەھێلایە دەرمانخانە چ دەرمانان ب ئۆنلاین فرۆشن و ھەکە سەرپێچی ھەبن دێ ھێنە سزادان، ھندەک دەرمانخانە یێن ھاتینە سزادان ژ بەر وان سەرپێچیان، ھەر جھەکێ ئەو بزانن کو دەرمانان دفرۆشن و نەیێ دەستویردایە ب ڤی کاری دێ رێکارێن قانوونی بەرامبەر وەرگرن و ب ھەماھەنگی دگەل لیژنەیا ھەڤپشک و د گەل قایمقامیێ.
گۆت ژی، ئەو حەز دکەن ھەر وەلاتییەکێ زانیاری ل سەر ڤان جھان ھەبن وان پێ ئاگەھدار بکەن، پێدڤییە خەلک بێی نۆشداران چ دەرمانان ژ کەسێن نە بسپۆر نەوەرگرن.
خانی نیوز، مەنیجا ئەیوب
