خواندن ل قوتابخانه‌یان دێ ئاسایی بیته‌ڤه‌

جێگرێ سەرۆکێ ئێکەتییا مامۆستایێن کوردستانێ ئاشکراکر کو ھەتا نوکە رەوشا ساخلەمیێ ل قوتابخانا گەلەک ل ئاستەکێ باش دایە، ھەکە ب ڤی رەنگی بیت دێ قوتابخانە ئاسایی بن.
عەبدولواحد حاجی، جێگرێ سەرۆکێ ئێکەتییا مامۆستایێن کوردستانێ ئەڤرۆ پێنج شەمبی ١١-٢-٢٠٢١ بۆ خانی نیوز گۆت: رەوشا پەژیکا کۆرۆنایێ ل ئاستەکێ باش دایە و ھژمارا کەسانێن تووشی کورونایێ بووین وەک قوتابی گەلەک کێمە و ب تنێ تبلێن دەستانە و ھەمی نابنە پێنچ کەس، هه‌روه‌سا ھندەکان ژى گومان ل سەر ھەیە و ھەتا نوکە چ قوتابخانە نەھاتییە داخستن، ب تنێ پۆلەک ھاتییەداخستن ل قەزا مێرگەسورێ و ئەو کەس ژی ل دەرڤە تووشی کۆرۆنایێ ببوو.
جێگرێ سه‌رۆكێ ئێکەتیا مامۆستان ئەو ژی گۆت: ژ ھەژمارا ملیۆنەک و ٨٠٠ قوتابیان و ١٣٠ ھزار مامۆستا و ٣٠ ھزر فەرمانبەران بتنێ پێنچ کەس تووشی كۆرۆنایێ بووینە و ئەڤە گەلەک باشە.
ھێشتا گۆت: ئه‌گه‌ر رەوش ب ڤی رەنگی بیت دێ دەوام ئاسایی بیت و ئەڤە گرێدایی رەوشا ساخلەمیێ یە ل ھەرێمێ و چەند کێم بیت دێ زووتر دەوام ئاسایی بیت.
جێگرێ ئێکەتیا مامۆستان ئەو ژی گۆت: وەزیرێ دارایی سوزدایە کو ھەر ٣٠ رۆژان جارەکێ مووچە بھێتە دابەشکرن و ل گەل وەزارەتێ ئاخفتینە وەزیری دیارکریە کو حوکمەتێ بریاردایە ھەر ٣٠ رۆژان جارەکێ مووچە بھێـتە بەلاڤەکرن.
ھەڤدەم، د.ئالان حه‌مه‌ سه‌عید وەزیرێ پەرورەدێ ل حكومەتا ھەرێما کوردستانێ ئەڤرۆ رۆژا پێنچ شەمبی دکۆنگره‌یەکێ رۆژنامەڤانی دا ئاشکراکر کو دەرگەھێن قوتابخانان د دەمەکی دا ھاتینەڤەکرن کو رەوشا کۆرۆنایێ بەر ب باشبوونێ ڤە چوویە، ئەڤە ژى وێ ناگەھینت کو کۆرۆنا ھەر نەمایە.
د.ئالانى گۆتژی: ماوێ سێ ھەیڤانه‌ تووشبوویێن کۆرۆنایێ بەر ب کێمبوونێ ڤە چووینە و گرنگە مامۆستا و قوتابی ژی ل ھۆلێن خواندنێ زێدەتر خوە ب پارێزن.

خانی نیۆز، سالار محەمەد دۆسکی