ئەڤرۆ دێ دادگەهـ ب دەمیرتاشی ھێت کرن

پشتی داخوازا دادگەھا مافێن مرۆڤی یا ئەورۆپا دەربارەی ئازادکرنا وی، ئەڤرۆ ھەڤسەرۆکێ پێشتر یێ پارتیا دیمۆکراتیک یا گەلان هه‌ده‌پێ دێ چیتە دادگەھێ.

بریارە ئەڤرۆ دادگەھا سەلاحەدین دەمیرتاش، ھەڤسەرۆکی پێشتر یێ ھەدەپێ ل نوزدەمین دادگەھا سزایێن گران یا ئەنقەرە دەستپێبکەت و دەمیرتاش د زیندانا ئەدێرنه‌ ڤە ب دەنگ و رەنگ دێ پشکداربیت و ھەتا سوبه‌ ژی دادگەھا وی دێ بەردەوام بیت.

رۆژا دوازدەی ئادارا ئەڤسالە دادگەھا مافێن مرۆڤی یا ئەورۆپا داخوازا ئازادکرنا دەمیرتاشی کر و بەری نھا ژی چەند جاران دادگەھا ئەورۆپا ئەو داخازە پێشکێشی تورکیا کربوو، لێ تورکیا سەرەرای ئیمزاکرنا پەیمانناما مافێن مرۆڤی یا ئەورۆپا وێ بریارێ ب سیاسی ددانیت و بجھنائینت.

جڤاتا ئێکەتیا ئەورۆپا ل رۆژێن ناڤبەرا ٩-١١ ئادارا ئەڤ سالە کۆمبوونەکا تایبەت دەربارەی چەندین بابەتێن پەیوەندیدار ب مافێن مرۆڤی کر ژوان ژی گوھنەدان و بجهـ نه‌ئینانا بریارا دادگەھا مافێن مرۆڤی ل ئەورۆپا  ژلایێ تورکیا ڤە، پشكه‌كا‌ وێ کۆمبوونێ بوو  و کۆمیتەیا وەزیرێن جڤاتێ بابەتێ زیندانکرنا دەمیرتاشی و ئۆسمان کاڤالای ئێخستە بەحسکرنێ و ڤەکۆلینێ. کومیتێ دبەرنامی َخوەیی َکاری ژی دا راگەھاندبوو بابەتێ سزادان و ھێلانا دەمیرتاشی و ئوسمان کاڤالا دزیندانێ ڤە دوبارە دئێختە رۆژەڤێ و دوپات ژی کریە زیندانکرنا دەمیرتاشی بۆ دەمێ سێ سالان و ھێلانا ئوسمان کاڤالا ل زیندانێ بابەتێن سیاسی نە و پەیوەندی ب رێکارێن قانوونی ڤە نین.

سەلاحەدین دەمیرتاش، ھەڤسەروکێ پێشتر یێ ھەدەپێ دچارچوڤێ ڤەکۆلینێن تیرۆرێ ل سالا ٢٠١٦ ھاتیە دەستەسەرکرن و زێدەتری چار سالانه‌ دزیندانا ئەدێرنا ڤەیە و ھەژمارەکا تومەتان  ئێخستینە بال وى، بەلێ دادگەھێ چ بریار نەداینە و دادگەھا وی بۆ ئەڤسالە ھاتە پاشئێخستن.