كێلیێن مه‌زارێ عه‌لى مه‌ردان ل کەرکووکێ هاتنه‌ تێكدان

سه‌رۆكێ لقێ هونه‌رمه‌ندێن كوردستانێ ل كه‌ركووكێ ئاشكراكر كو هاتینه‌ ئاگه‌هداركرن كو كێلیێن گورێ هونه‌رمه‌ندێ كوردێ مه‌زن (على مه‌ردان) هاتینه‌ تێكدان، ڤى كارى ب توندى شه‌رمزار دكه‌ن و نزانن كینه‌ ئه‌ڤ كاره‌ ئه‌نجام داى.

سیروان عومه‌ر، سه‌رۆكێ سه‌ندیكا هونه‌رمه‌ندان لقێ كه‌ركووكێ، بۆ خانى نیۆز گۆت: ئەو ب توندى ئیدانا ڤى كارى دكه‌ن، هونه‌رمه‌ند عه‌لى مه‌ردان پاشایێ سترانێ یه‌ و شانازیێ پێ دبه‌ن و هه‌موو جیهان شانازیێ ب ره‌وشه‌نبیر و كه‌سانێن سیاسى و كه‌لتوری یێن خوه‌ دبه‌ن، گرنگه‌ بهێنه‌ پاراستن، ئەو ڤى كارى شه‌رمزار دكه‌ن چنكو ئه‌ڤه‌ بۆ نه‌شرینكرنا كه‌لتوورێ ملله‌تێ مه‌ یه‌.

سه‌رۆكێ سه‌ندیكا هونه‌رمه‌ندان ل كه‌ركووكێ، ئه‌و ژى ئاشكراكر كو پشتى ئه‌نجامدانا ڤى كارى ئه‌ڤرۆ چه‌ند گه‌نجێن كه‌ركووكێ وه‌ك كاره‌كێ خوبه‌خشانه‌ چوونه‌ گورستانێ و گورێ هونه‌رمه‌ند عه‌لى مه‌ردان وه‌ك پێشتر دروستكریه‌ڤە.

ئاشكراكر ژى كو به‌رى هه‌یڤه‌كێ هه‌ر ل كه‌ركووكێ تابلوویه‌كا هه‌لبه‌ستڤانێ كورد ئه‌حمه‌دێ خانى ژى هاتبوو تێكدان، دیسا هه‌ر هنده‌ك گه‌نج رابوون ب دروستكرنا وێ تابلویێ ڤه‌ ب شێوه‌كێ جوان.

خانى نیۆز، په‌یوه‌ندى ب عه‌بدولقادر عه‌لى مه‌ردان كر كو كورێ هونه‌رمه‌ندێ كورد عه‌لى مه‌ردانه‌، لێ چنكو یێ تووشى په‌ژیكا كۆرۆنایێ بووى نه‌شییا به‌رسڤێ بده‌ت، ب تنێ ئیدانا ڤى كارى كر.

هه‌ر ل دوور ڤێ روودانێ هونه‌رمه‌ندێن كه‌ركووكێ كه‌مپینه‌كا نه‌رازیبوونێ راگه‌هاندییه‌ و تێدا داخاز دكه‌ن ئه‌نجامده‌رێن ڤى كارى بگه‌هنه‌ سزایێ خوه‌ و رێز ل هونه‌رمه‌ند و ره‌وشه‌نبیرێن كوردستانێ بهێته‌گرتن.

خانى نیۆز، سالار محه‌مه‌د دۆسكى: