چار سال ب سه‌ر بریارا دیرۆكییا سه‌ركردایه‌تییا سیاسییا هه‌رێما كوردستانێ بۆ رێفراندۆما سه‌رخوه‌بوونا كوردستانێ ده‌رباز بوون.
ب سه‌رپه‌رشتییا سه‌رۆك مه‌سعوود بارزانى سه‌ركردایه‌تییا پترییا ئالیێن سیاسى یێن هه‌رێما كوردستانێ و نوونه‌رێن هه‌موو پێكهاته‌یێن هه‌رێمێ ل رۆژا 7ێ خزیرانا سالا 2017ێ كۆمبوون و بریار دا ل رۆژا 25ێ ئیلۆنا 2017ێ رێفراندۆما سه‌رخوه‌بوونا كوردستانێ بهێته كرن.
رۆژا 25ێ ئیلۆنا سالا 2017ێ وه‌كو جه‌ژن و كه‌رنه‌ڤاله‌كا نه‌ته‌وه‌یى بوو بۆ گه‌لێ كوردستانێ و هه‌موو خه‌لكێ كوردستانێ ل هه‌موو باژار و باژاركێن كوردستانێ ب كه‌یف و شاهى و دیلان چوونه سه‌ر سندۆقان و ده‌نگ بۆ سه‌رخوه‌بوونا كوردستانێ دا و ئه‌نجام 93%ێ ده‌نگده‌ران ده‌نگ بۆ ده‌وله‌تا كوردستانێ دا.
پشتى 21 رۆژان ژ رێفراندۆمێ گرۆپه‌كێ ل ناڤا ئێكه‌تییا نشتیمانییا كوردستانێ كو پۆستێن بلند ژى د سه‌ركردایه‌تییا وێ حزبێ دا نه‌بوون، ل رۆژا 16/10/2017 فه‌رمان ب هێزه‌كا پێشمه‌رگه‌یێن سه‌ر ب حزبا خوه‌ڤه دا خوه ژ كه‌ركووكێ ڤه‌كێشن و ڤه‌گه‌رن سلێمانیێ و رێ بۆ داگیركرنا كه‌ركووكێ و ده‌ڤه‌رێن كوردستانى بۆ حه‌شدا شه‌عبى و سوپایێ پاسدارێن ئیرانێ ڤه‌كر.
پشتى وێ یه‌كێ حه‌شدا شه‌عبى و هێزێن د گه‌ل وان دا هێرشا خوه بۆ سه‌ر هه‌ولێرێ و سێگۆشا سنۆریا د ناڤبه‌را هه‌رێم و باكور و رۆژئاڤایێ كوردستانێ دا ده‌ستپێكر، لێ پێشمه‌رگه‌یێن كوردستانێ ب بیروباوه‌ره‌كا ب هێز به‌رسینگێ وان هێرشان گرت و داستانێن مه‌زن ب ناڤێ داستانا پردێ و داستانا سحێلا تۆمار كرن و رێ نه‌دا دوژمن جاره‌كا پێ خوه ل ئاخا كوردستانێ بنه‌جهـ بكه‌ن.
