حكومه‌تا هه‌رێما كوردستانێ د ده‌مێ بوریدا به‌رده‌وام د بزاڤا هندێ دابوون كو بانزینێ بۆ وه‌لاتییان دابین بكه‌ن و ب بهایه‌كێ گونجایى، به‌لێ ژبه‌ر هندێ كو پشكه‌كا زۆرا بانزینێ ژ ده‌رڤه‌ى هه‌رێمێ دهێته هاوه‌رده‌كرن، كو ئه‌و ژى یا گرێدایى بوو ب بهایێ نه‌فتێ و د ده‌مێ بوریدا بهایێ نه‌فتێ ل سه‌ر ئاستێ جیهانێ بلندبوویه، كو ئه‌و ژى بوویه ئه‌گه‌رێ بلند بوونا بهایێ بانزینێ ژى، هه‌روه‌سا هنارتنا بانزینێ بۆ هه‌رێما كوردستانێ ل هنده‌ك خالێن سنوورى هاتییه راگرتن.
ژبه‌ر هندێ، سه‌رۆكێ حكومه‌تا هه‌رێما كوردستانێ وه‌زاره‌تا سامانێن سرۆشتى راسپاردییه سه‌ره‌دانا به‌غدا بكه‌ت بۆ گۆتوبێژان ب مه‌ره‌ما چاره‌سه‌ركرنا پشكه‌كا ئاریشان.
ژلایه‌كێ دیڤه سه‌رۆكێ حكومه‌تێ وه‌زاره‌تا سامانێن سرۆشتى راسپاردییه هه‌ماهه‌نگیێ بكه‌ن ل گه‌ل كه‌رتێ تایبه‌ت بۆ هندێ پلانا گۆنجاى بۆ هاوه‌رده‌كرنا بانزینێ بهێته دانان هه‌تاكو ل داهاتى دا قه‌یران دروست نه‌بن.
سه‌باره‌ت نه‌فتا سپى، وه‌زاره‌تا سامانێن سرۆشتى هاتییه راسپاردن بۆ چاره‌سه‌ركرنا ئه‌ڤى بابه‌تى ب رێكا دابینكرنا نه‌فتا سپى و به‌لاڤكرنا وێ ل سه‌ر وه‌لاتییان و ب زووترین ده‌م.
گۆتى ژى ، ئه‌م وه‌لاتییان پشت راستدكه‌ین كو حكومه‌تێ هه‌موو بزاڤه‌كێ دكه‌ت بۆ چاره‌سه‌ركرنا ئه‌ڤێ ئاریشێ.
د. جوتیار عادل
په‌یڤدارێ حکومەتا هەرێما کوردستانێ
١٤چریا ئێكێ ٢٠٢١
