وەزیرێ نەفتا عیراقێ راگەهاند، 80% ێ یا گرێبەستێن نەفتی یێن هەرێما کوردستانێ د دروستن و ب تنێ كێشه ژ 20% ێ یا گرێبه‌ستان هه‌یه و کێشێن دناڤبه‌را هەولێر و بەغدا دا ژ نەبوونا باوه‌ریێ یە.
ئێحسان عەبدولجەبار گۆت ژی: گرێبەستێن نەفتی یێن حکومەتا هەرێما کوردستانێ سه‌رپێچی یێن مه‌زن نینن و هه‌موو د دروستن، وان ب تنێ کێشە ل گەل 20% ێ هه‌یه و پێدڤییه پێداچوون تێدا بهێته كرن .
ئه‌و ژی گۆت، وەزارەتا نه‌فتێ رێیە چارەیەک خستییه به‌رچاڤ بۆ چارەسەرکرنا پرسا نەفتا هەرێما کوردستانێ د كڤانێ دەستووری عێراقێ و بریارا دادگه‌ها فیدرالی.
د هه‌مان ده‌مدا وەزیرێ نەفتێ گەشبینییا خۆ نیشاندایه كو ده‌ستهه‌لاتا هه‌رێمێ ب پێشنیارێن وان رازیببن و گۆت، دڤێت هەردو ئالی سازشێ ل سه‌ر پشكه‌كێ ژ وان داخوازییان بکەن” بۆ هندێ بگه‌هنه رەشنڤیسه‌كێ هه‌ڤپشك.
ئێحسان عه‌بدولجه‌باری ئاشكرا كر ژی: وان گۆتییه بەپرسێن هەرێم و شاندێ وان، ئه‌م پابەندین ب سێ خالان، ئەو ژی پێداچوون د گرێبەستێن نەفتێ دا و دروستکرنا کۆمپانیا نەفتا کوردستانێ، کو سەر ب حکومەتا فیدرال ڤه‌بیت و بارەگایێ وێ ل هەولێرێ بیت، ل گەل سیاسەتا پێشخستنا کێلگه‌هێن نەفتی و هنارتنێ، کو ب هه‌ڤپشكی دناڤبه‌را هەرێمێ و بەغدا دا بریار ل سەر بهێته دان.
