ئێكى ئه‌یارێ، رۆژا جیهانى یا كرێكاران ب گه‌رمى ل ته‌ڤایا كرێكارێن كوردستانێ سه‌ندیكا و رێكخراوێن وان و كرێكارێن عیراقێ و جیهانێ پیرۆزدكه‌م، ده‌ستێ وان دگڤێشم و ب رێزڤه ل ئه‌رك و رۆلێ وان د نێرم و داخوازا سه‌ركه‌فتنێ بۆ دخوازم.
كرێكار وه‌ك ته‌خه‌كا گرنگ و كارتێكه‌ر یا جڤاكێ كوردستانێ، سه‌ره‌راى قۆربانیدانا وان و پشكدارییا وان د خه‌بات و پێشمه‌رگایه‌تییێ دا، هه‌رده‌م رۆله‌كێ به‌رچاڤ د پرۆسا ئاڤه‌دانكرن و پێشڤه‌برنا وه‌لاتى دا هه‌یه. پێدڤییه رێز ل مافێن وان بهێته گرتن و ژیانا وان یا پاراستى بیت و رێكخراو و سه‌ندیكایێن وان د چالاكتربن ژبۆ وێ یه‌كێ باشتر ماف و شایسته‌یێن وان ب پارێزن و پشت راستییێ بكه‌ن كۆ كرێكار د ژینگه‌هه‌كا درۆست دا كاردكه‌ن. د ڤێ بیره‌وه‌رییێ دا، دۆپاتییێ ل پشته‌ڤانییا هه‌موو ماف و داخوازییێن ره‌وا یێن كرێكارێن دكه‌ین، پێدڤییه ل سه‌ر سازى و لایه‌نێن په‌یوه‌ندیدار یێن هه‌رێما كوردستانێ د چارچووڤێ یاسایێ دا ره‌چاوا ژیان و گوزه‌رانا كرێكارێن كوردستانێ بكه‌ن و بزاڤا باشتركرنا ژیانا وان بده‌ن و چاڤدێرییا خێزانێن وان كرێكاران بكه‌ن یێن دده‌مێ كاركرنێ دا ژیانا خۆه ژده‌ست داى.
