<h2 style="text-align: justify;"><span style="font-size: 18pt;">حکومەتا هەرێما کوردستانێ راگەهاند، د نوکە دا ژ ئەگەرێ بلند بوونا بهایێ پانزینێ ل هەرێما کوردستانێ، بێزاریەک ل دەف وەلاتیێن خوشتڤی درست بوویە و ب پێدڤی دزانین چەند راستییان دیار بکەین.</span></h2> <h2 style="text-align: justify;"><span style="font-size: 18pt;">حکومەتا هەرێمێ د راگەهاندنا خۆ دا دیارکریە، حکومەتا هەرێما کوردستانێ هەمی بزاڤ کرینە ژ پێخەمەت دابینکرنا پانزینێ ب کۆالێتیەکا باش و بهایەکێ گونجای بۆ وەلاتییان، ئەڤەژی ب رێیا رێگریکرن ل ئینانا پانزینێ و رێ نەدان ب ئینانا پانزینا بێ کۆالێتی، بۆ وێ مەرەمێ ژی کارئاسانیا تمام کریە بۆ بازرگانان وەک راکرنا باجێ و گۆمرکێ لسەر ئینانا پانزینێ، بەلێ پێدڤیە ئەو پانزینا دهێت کۆالێتیەکا باش هەبیت و د چارچوڤێ رێنماییێن وەزارەتا سامانێن سروشتی دا بیت.</span></h2> <h2 style="text-align: justify;"><span style="font-size: 18pt;">هەر وەسا ئاشکرا کریە، د هەمان دەم دا و ب مەرەما دابینکرنا پشکەکا پێدڤیێن ناڤخۆ، حکومەتا هەرێما کوردستانێ رۆژانە نێزیکی 1 ملیون لترێن پانزینێ بەرهەم د ئینیت و ب بهایێ 690 دیناران ب رێیا چەند پانزینخانان دێ ل سەر وەلاتیان دابەشکەت و وەزارەتا سامانێن سروشتی ب رێیا لژنێن تایبەت دێ چاڤدێرییا بەردەوام ل سەر پانزینخانان کەت و هەر پانزینخانەکا سەرپێچیێ بکەت یان کۆالێتییا پانزینا وی یا خراب بیت دێ هێتە سزا دان.</span></h2> <h2 style="text-align: justify;"><span style="font-size: 18pt;">حکومەتا هەرێمێ ئاماژە کریە، پێدڤە ئەو راستیە ژی بهێتە گوتن کو ل گۆرەی رێکەفتنەکێ دناڤبەرا هەردوو وەزارەتێن سامانێن سروشتی و وەزارەتا نەفتا حکومەتا فیدرال، بڕیار ئەو بوو کو حکومەتا فیدرال رۆژانە ئێک ملیون لترا پانزینێ بۆ هەرێمێ بهنێریت، بەلێ د 9 مەهێن دەربازبووی دا بتنێ نێزیکی نیڤ قەبارێ کو بڕیار بوو بهنێریت، هنارتیە و ل دەستپێکا مەها ئەیارا ئەڤ سالە چ پانزینا دی بۆ هەرێمێ نە هنارتیە، ئەڤەژی ژ ئەگەرێ وان هێرشێن تیرۆرستی یێن کو ل سەر پشکەکا پالاوگەها کار کو ئەو پانزینا تێدا دهاتە پالاوتن حکومەتا فیدرال د هنارت.</span></h2> <h2 style="text-align: justify;"><span style="font-size: 18pt;">ل دوماهیا راگەهاندنا خۆ حکومەتا هەرێما کوردستانێ دیارکریە،سەرەڕای ئەو ئاریشێن هاتینە باسکرن بشێوەکێ گشتی بهایێ پانزینێ لسەر ئاستێ جیهانێ ژ ئەگەرێ رەوشا شەری بلند بوویە لەورا ڤی ئەگەری کارتێکرن لسەر بهایێ پانزینێ ل هەرێما کوردستانێ ژی کریە.</span></h2> <h2 style="text-align: justify;"><span style="font-size: 18pt;">لەورا خەلکێ خۆ پشتراست دکەین بزاڤێن حکومەتێ دێ د بەردەوام بن بۆ چارەسەرکرنا ڤێ ئاریشێ.</span></h2>
