وه‌زاره‌تا سامانێن سرۆشتى د راگەهاندنەکێ دا دیارکر، داخازکرنا كۆمپانيێن بيانى يێن نەفتێ کو ل هه‌رێما كوردستانێ كار دكه‌ن بۆ دادگه‌ها بازرگانى يا كه‌رخ يا نە ياسايى بوو.
وەزارەتا سامانێن سروشتی ئاماژەکریە،ل رۆژا 19ی مەها گۆلانێ ل سه‌ر داخازا وه‌زيرێ نەفتا ئيراقێ، كۆمپانيێن نەفتێ يێن بيانى، کو ل هه‌رێما كوردستانێ كار دكه‌ن بۆ دادگه‌ها بازرگانى يا كه‌رخ ل به‌غدا هاتبوونه داخازکرن، ژ وان كۆمپانيێن ژى DNO، وێسترن زاگرۆس، HKN، شاماران، جه‌نه‌ل ئێنرجى، ئاداكس و گۆلف كيستۆن، كو گرێبه‌ستێن وان ل گۆره‌ى ياسايا نه‌فت و غازێ یا ژماره 22 يا سالا 2007 ێ يا هه‌رێما كوردستانێ هاتبوونه ئيمزاكرن، ئه‌و ياسايه ل گۆره‌ى مادده‌يێن ده‌ستوورێ ئيراقێ ژ لايێ په‌رله‌مانێ كوردستانێ ڤه هاتبوو دەرکرن.
هەر وەسا د راگەهاندنێ دا ئاشکرا کریە، دادگه‌ها فيدرالى ل 15ى شوباتا 2022 ێ ب پشتەڤانیەکا سياسى بۆچوونه‌ك ده‌رێخست کو مەرم پێ راوستاندنا ياسايا نه‌فت و غازێ يا سالا 2007 ێ یا هه‌رێما كوردستانێ بوو كو چ دادگه‌هێن به‌غدا ده‌ستهه‌لات نينن بڕياره‌كا وەسا بده‌ن.
وەزارەتا سامانێن سروشتی دیارکریە، سه‌رۆكاتيێن هه‌رێما كوردستانێ بڕيارا دادگه‌ها فيدالى ره‌تكربوون و جڤاتا دادوه‌رى یا هه‌رێمێ راگەهاندبوو، ل گۆره‌ى برگا دوو ژ ماددێ 92 یێ ده‌ستوورێ ئيراقێ پێدڤيه جڤاتا نوينه‌رێن ئيراقێ ياسايه‌كێ بۆ دامه‌زراندنا دادگه‌ها فيدرالى ب دەرێخیت، لێ تا نوكه نه‌هاتيه چ بڕیار نە هاتینە ده‌ركرن له‌ورا دادگه‌ها بلند يا فيدرالى ل گۆره‌ى ده‌ستوورى نه‌هاتيه دامه‌زراندن و چ ده‌ستهه‌لاتێن ده‌ستوورى نينن كو كاره‌كێ وه‌سا بكه‌ت کو ياسايا نه‌فت و غازێ يا هه‌رێما كوردستانێ دێ بەردەوام بكاركرى مينيت.
وەزارەتا سامانێن سروشتی راگەهاندییە، ل 5ى خزيرانا سالا 2022 دادگه‌ها ڤەکۆلینان ل هه‌ولێرێ بڕيار دابوو كو ئه‌و سكالايێن ل دادگه‌ها بازرگانى يا كه‌رخ یێن ل دژى كۆمپانيێن نێڤده‌وله‌تى هاتينه تۆماركرن، پێدڤيه بۆ دادگه‌ها ڤەکۆلینان ل هه‌ولێرێ بهێنه راوانه‌كرن و ل گۆره‌ى ياسايێ بنه‌مايێن دادگه‌هكرنا سزايى یا ژماره 23ێ يا سالا 1979 ، هه‌مى سكالايێن ياسايى ل دادگه‌ها كه‌رخ د ڤى بوارى دا هاتينه تۆماركرن، بهێنه پاشئێخستن و وه‌زاره‌تا نەفتێ يا ئيراقێ كارێن دادگه‌ها مه‌ده‌نى رابگريت تا كو رێكارێن دادگه‌ها ڤەکۆلینان تهمام دبن و بڕيار ل سه‌ر دهێته دان.
وەزارەتا سامانێن سروشتی ل دوماهیا روهنکرنا خۆ دیارکریە، پشتى تهمامبوونا ڤەکۆلینێ ب پشتگرێدان ب ماددێ 38 یێ ياسا داد بينییا شارستانى يا ئيراقێ یا ژماره 83 يا سالا 1969ێ، ل گۆره‌ى تايبه‌تمه‌نديا جهی پێدڤيیه ئه‌و سكالايه ل دادگه‌هێن شارستانى يێن هه‌رێما كوردستانێ داد بينى بۆ بهێته كرن و بڕيار ل سه‌ر بهێته دان ژبەرکو كۆمپانيێن داخازكرى هه‌مى ل كوردستانێ هاتينه تۆماركرن و ل كوردستانێ كار دكه‌ن.
