ئه‌ڤرۆ 13-11-2022 حه‌فت سال ب سه‌ر رزگاركرنا شنگالێ ده‌ربازبوون كو ب سەرپەرشتییا راستەوخۆ یا سەرۆك بارزانی و ب پشكدارییا 7 هزار و 500 پێشمەرگەیان هاته رزگاركرن.
چەكدارێن رێكخراوا تیرۆریستییا داعش، ل 03-08-2014 هێرش كره سه‌ر شنگالێ كو باژێره‌كێ كوردستانێیه و پترییا وه‌لاتییێن وێ كوردێن ئێزدینه و سه‌ر ب ئیداره‌یا پارێزگه‌ها نه‌ینه‌وایه، گه‌له‌ك ژ وه‌لاتییێن وێ ده‌ڤه‌رێ ژ زه‌لام و ژن و گه‌نج و زارۆكان ده‌سته‌سه‌ركرن و گه‌له‌ك ژ وان دناڤ گۆرێن ب كۆمدا بن ئاخكرن و كڕین و فرۆتن ب كچ و ژنێن وێ ده‌ڤه‌رێ هاته‌كرن و ئه‌و كه‌سێن ره‌ڤین و نه‌كه‌فتینه د ده‌ستێ وان دا به‌ره‌ف باژێرێن هه‌رێما كوردستانێ چوون و هه‌تا نوكه ئه‌و ئاواره دناڤ كه‌مپێن هه‌رێما كوردستانێدا ژیانا خوه دبه‌نه سه‌رى.
پشتى داگیركرن و جینۆسایدكرنا شنگالێ ژ ئالییێ تیرۆرستێن داعش، سه‌رۆك بارزانى سوزدا وه‌لاتییێن كوردێن ئێزدى كو شنگالێ دێ رزگار كه‌ین و دێ تۆلا شه‌هیدان ژ تیرۆرستێن داعش ڤه‌كه‌ین.
رۆژا 13-11-2015، پشتى ساله‌كێ ژ داگیركرنا شنگالێ د ئۆپه‌راسیۆنه‌كا دوو رۆژى هێزێن پێشمه‌رگه‌ییێن كوردستانێ كو هژمارا وان 7 هزار و 500 پێشمه‌رگه بوون، لژێر سه‌ركردایه‌تییا راسته‌وخۆ یا سه‌رۆك بارزانى ب هاریكارییا هاڤپه‌یمانان، هێرش كره سه‌ر چیایێ شنگال و ده‌وروبه‌رێ شنگالێ و شیان قه‌زایا شنگالێ هه‌میێ ژ تیرۆرستان رزگاربكه‌ن.
پشتى رزگاركرنا شنگالێ، میر ته‌حسین به‌گ، میرێ وى ده‌مى یێ ئێزدییێن كوردستان د به‌یانامه‌یه‌كێدا، ئۆپه‌راسیۆنا هێزێن پێشمه‌رگه‌ى ب سه‌رپه‌رشتییا راسته‌خۆ یا سه‌رۆك بارزانى ب رۆژه‌كا دیرۆكى دا نیاسین و ڕاگه‌هاند، رزگاركرنا شنگالێ خۆشى و شادى ئێخسته دناڤ دلێ هه‌مى ئێزدییێن كوردستانێ و مرۆڤایه‌تییێدا.
لدووڤ سه‌رژمێرییه‌كا نڤێسینگه‌ها رزگاركریێن ره‌ڤاندییێن ئێزدییان كو ژ ئالییێ نه‌ته‌وه‌یێن ئێكگرتى ڤه یا باوه‌رپێكرییه، هژمارا ئێزییان ل هه‌رێما كوردستان و عیراقێ نێزیكى 550 هزار كه‌سانه، 135 هزار و 337 ئێزدى ئاوه‌ره‌بووینه و نوكه دناڤ خیڤه‌تێن باژێرێن هه‌رێما كوردستانێ ئاكنجینه.
هه‌ر لدووڤ سه‌رژمێرییه‌كا نڤێسینگه‌ها رزگاركریێن ره‌ڤاندییێن ئێزدییان، دوو هزار و 745 زارۆك ئێتیم بوون و هه‌تا نوكه 83 گۆرێن ب كۆم ب و ده‌هان گۆرێن تاك هاتینه دیتن، 29 كه‌س د گۆرێن ب كۆم دا رزگاربووینه، هه‌روه‌سا هژمارا كۆچبه‌ران بۆ ده‌رڤه‌ى وه‌لاتى نێزیكى 120 هزار كۆچبه‌رن، 6 هزار و 417 كه‌س هاتینه ره‌ڤاندن كو سێ هزار و 548 كه‌س ره‌گه‌ز مێ نه و دوو هزار و 869 كه‌س ره‌گه‌ز نێرن.
سه‌رژمێرییا نڤێسینگه‌ها رزگاركریێن ره‌ڤاندییێن ئێزدییان دیاركرییه، سێ هزار و 562 كه‌س ژ ده‌ستێ تیرۆرستێن داعش رزگاربووینه كو 1207 ژ وان ژن و 339 ژ وان زه‌لامن و هه‌روه‌سا 1059 زارۆكێن كچ و 957 زارۆكێن كۆرن، هژمارا شه‌هیدێن ڕاده‌ستى كه‌سوكارێن وان كرین 162 شه‌هیدن كو 20 ژ وان ره‌گه‌ز مێ نه و 142 ره‌گه‌ز نێرن، هه‌روه‌سا ئه‌وێن هه‌تا نوكه ماین 2693 كه‌سن كو 1262 ژ وان مێ و 1431 ره‌گه‌ز نێرن.
