شانده‌كێ جڤاتا رووحانییا ئێزدییان ب سه‌رۆكایه‌تییا میر حازم میر ته‌حسین به‌گ، سه‌ره‌دانا رۆما كر و دگه‌ل پاپایێ ڤاتیكان كۆمبوو.
میرێ ئێزدییان و پاپایێ ڤاتیكان به‌حسێ ره‌وشا خراب یا شنگالێ كر و میرێ ئێزدییان داخواز ژ پاپایێ ڤاتیكانێ كر چاره‌سه‌رییه‌كێ بۆ ئێزدییان ببینین و ئاواره ڤه‌گه‌رنه شنگالێ و زێده‌تر گۆتێ: چ ئاڤه‌دان و خزمه‌تگوزارییه‌ك ل شنگالێ نینن و داخواز ژ هه‌وه دكه‌ین ده‌نگێ ئێزدییان بگه‌هینه هه‌مى جیهانێ داكو ره‌وشا شنگالێ چاره‌سه‌ربیت.
میر حازم میر ته‌حسین به‌گ د كۆمبوونێدا دیاركر، مه دڤێت رێككه‌فتنا شنگالێ كو دناڤبه‌را حكومه‌تا هه‌رێما كوردستانێ و حكومه‌تا فیدرال هاتیه ئیمزاكرن بهێته بجهئینانان چونكى ئه‌و رێككه‌فتنه دێ بیته ئارامى بۆ شنگالێ و دشێن ڤه‌گه‌رنه سه‌ر جهێن خۆ و هه‌روه‌سا داخواز ژ هه‌وه دكه‌ین كار ل سه‌ر پرسا جینۆسایدا ئێزدییان یا سالا 2014 ل سه‌ر ده‌ستێ تیرۆرستێن داعش بكه‌ن.
هه‌روه‌سا میرێ ئێزدییان بۆ پاپایێ ڤاتیكانێ گۆت: داخواز ژ هه‌وه دكه‌ین ئه‌و ئێزدییێن تا نوكه دناڤ كه‌مپێن یۆنان دا ماین بۆ وه‌لاتێن ئه‌ورۆپا ڤه‌گوهێزن، ژبه‌ركو گه‌له‌ك ژ وه‌لاتییێن ئێزدى ژ ئه‌گه‌رێ ره‌وشا خراب به‌ره‌ڤ وه‌لاتێن ده‌رڤه چووینه.
