رێڤه‌به‌رێ وەبەرھێنانا زاخۆ ئاشکرا کر، كۆمپانییه‌كا وه‌لاتێ ئیماراتێ ب ناڤێ ( ئێن ئار سی ئۆ) دێ پرۆژه‌كێ وەبەرھێنانێ ل زاخۆ بجهـ ئینیت و ل هه‌ر چار وەرزێن سالێ دێ بەرھەمێ چاندنێ به‌رهه‌م ئینیت.
ئەندازیار جه‌گەرخوین تاھر، رێڤەبەرێ وەبەرھێنانا زاخۆ، بۆ ئاژانسا خانی دیار كر، كۆمپانییه‌كا وه‌لاتێ ئیماراتێ دێ پڕۆژەكێ وەبەرھێنانێ ل سنوورێ ئیدارا سەربەخۆ یا زاخۆ ئەنجام دەت و ئه‌و پڕۆژێ چاندنێ دێ ل سەر رووبەرێ ھزار دۆنه‌مێن ئه‌ردی هێته دانان، سەرمایێ وی پرۆژێ چاندنێ سێ ملیۆن دۆلارن، بەرێ بنیاتی بۆ وی پڕۆژه‌یی هاتییه دانان و نوكه ئه‌و پرۆژه د قووناغا پێدانا ده‌ستویرییا وەبەرھێنانێ دایه.
ناڤهاتی گۆت ژی، ئه‌و پرۆژێ چاندنێ یێ چار وەرزییە و ژ چار پشكان پێکھاتییە و سی پشك بۆ چاندنێ دێ هینه ته‌رخان كرن و پشكه‌ك ژی بۆ ڤه‌كۆلینێن چاندنێ دێ هێته ب كارئینان، ل ھەر چار وەرزێن سالێ دا دێ بەرھەمێ چاندنێ د وی پرۆژه‌یی دا هه‌بیت و وی پرۆژه‌یی دێ کاریگەری ل سەر کەرتێ چاندنێ ل زاخۆ هه‌بیت و دێ ده‌لیڤێن كاری بۆ هژماره‌كا مه‌زن یا جۆتیاران په‌یدا كه‌ت و دی ڤه‌كۆلینێن چاندنێ بۆ هه‌موو كوردستانێ هێنه ئه‌نجامدان و و هه‌روه‌سا ته‌كنولۆژییا چاندنێ دێ هێته ب كارئینان و ل ده‌مێ ئاڤدانێ دێ 60% ێ ئابووری د وی پرۆژه‌یی دا هێته ب كارئینان و ئه‌و پرۆژه دێ ده‌لیڤێن كاری بۆ جۆتیاران په‌یدا كه‌ت.
جگه‌رخوینی گۆت ژی: هه‌شت هزار و 500 جۆتیار ل ئیدارا سه‌ربه‌خۆیا زاخۆ هه‌نه و د هه‌مان ده‌مدا دێ 50 ده‌لیڤێن كاری بۆ ده‌رچوویێن ئه‌كادیمی د وی پرۆژه‌یی دا هێنه په‌یدا كرن و خانی یێن شووشه‌یی دێ هێنه ئاڤاكرن و دێ د ده‌مێ چار سالان دا ئه‌و پرۆژه دێ به‌رهه‌می ده‌ت.
