مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل لۆرد تارق ئه‌حمه‌د وه‌زیرێ ده‌وله‌تا بریتانیا بۆ كاروبارێن رۆژهه‌لاتا ناڤه‌راست و ئه‌فریكا و باشوورێ ئاسیا و نه‌ته‌وه‌یێن ئێكگرتى ل وه‌زاره‌تا ده‌رڤه‌ى یا بریتانیا كر.
دكۆمبوونا واندا كو مارك برایسن ریچاردسن بالیۆزێ بریتانیا ل عیراقێ تێدا یێ به‌رهه‌ڤبوو، لۆرد ئه‌حمه‌دى ئاماژه ب هندێ دا كو پشتى سه‌ره‌دانا وى یا ئێكێ بۆ هه‌رێمێ ل سالا 2018ێ، گوهۆرین و پێشكه‌ڤتن و ئاڤه‌دانییه‌كا به‌رچاڤ ل هه‌رێما كوردستانێ روودایه.
گوت ژى: هه‌رێما كوردستانێ پێگه‌هه‌كێ گرنگ و تایبه‌ت ل ده‌ڤه‌رێ هه‌یه و حه‌زا وه‌لاتێ خوه بۆ پێشڤه‌برنا په‌یوه‌ندییان دگه‌ل هه‌رێمێ دووپاتكر.
مه‌سرور بارزانى سه‌رۆكێ حكومه‌تا هه‌رێما كوردستانێ سوپاسییا به‌رده‌وامییا پشته‌ڤانییێن بریتانیا بۆ هه‌رێما كوردستانێ كر، و كورتییه‌ك ده‌رباره‌ى چاكسازییێن كابینه‌یا نه‌هێ دبیاڤێن هه‌مه‌جۆركرنا ئابوورى و گرنگیدان ب كه‌رتێ چاندنێ و هنارده‌كرنا به‌رهه‌مێ ناڤخۆ بۆ بازارێن ده‌رڤه و دیجیتالكرنا خزمه‌تگوزارییێن گشتى و كاروبارێن حكومه‌تێدا پێشكێشكر.
ته‌وه‌ره‌كێ دییێ كۆمبوونێ یێ تایبه‌ت بوو ب گرنگییا چاره‌سه‌ركرنا ئاریشه‌یێن هه‌رێما كوردستانێ و حكومه‌تا فیدرال، هه‌ردوو لایه‌ن ل سه‌ر هندێ دهه‌ڤرابوون كو چاره‌سه‌ركرنا ئاریشه‌یان ل سه‌ر بنه‌مایێن ده‌ستوورى د به‌رژه‌وه‌ندییا هه‌موو وه‌لاتى و پێكهاته‌یێن جوودا یێن عیراقێدایه.
سه‌رۆكێ حكومه‌تێ ئاماژه ب هندێ دا كو هنده‌ك پێشكه‌ڤتن و لێكتێگه‌هشتنه‌كا باش ده‌رباره‌ى پرۆژه قانوونا بودجه‌یا فیدرالدا هه‌یه، ب تایبه‌ت كو ئه‌ڤه جارا ئێكێیه هه‌رێما كوردستانێ ئاماده‌یى ره‌شنڤیسا پرۆژه‌یێ بودجه‌یێ دبیت، وگوت: هیڤییا وان ئه‌وه ل نێزیكترین ده‌م جڤاتا نوونه‌رێن عیراقێ پرۆژه قانوونێ په‌سه‌ندبكه‌ت و ماف و شایسته‌یێن داراییێن هه‌رێما كوردستانێژى ل دووڤ ده‌ستوورى دابین بكه‌ت، هه‌روه‌سا دووپاتى ل سه‌روه‌رییا قانوون و پاراستنا سه‌قامگێرى و داكۆكیكرن ل به‌رده‌وامییا حكومه‌ته‌كا خزمه‌تگوزار كر.
بجهئینانا رێككه‌ڤتنا شنگالێ و ده‌ركه‌ڤتنا میلیشیی و هێزێن چه‌كدار یێن نه‌قانوونى و ئاساییكرنا ره‌وشا ده‌ڤه‌رێ و ڤه‌گه‌راندنا ئاواره‌یان بۆ جهێن وان، ته‌وه‌ره‌كێ دییێ دانوستاندنان بوو.
