ئەگەر چ ئالۆزییێن سیاسی و بهانە نە هێنە دروستکرن، هەلبژارتن دێ ل دەمێ خۆ یێ دەستنیشانکری هێنە کرن

هەوار محەمەد، پەیڤدارێ پشکا هەلبژارتنێن پارتی دیموکراتی کوردستان بۆ ئاژانسا خانی ڕاگەهاند، بڕیاربوو سوبەهی کۆمسیونا هەلبژارتنێن عیراقێ لدوور پرسا ئەنجامدانا هەلبژارتنێ پەرلەمانێ کوردستانێ کۆمببیت، لێ ئەو کۆمبوونە هاتە پاشئێخستن. گوتژی:”پێشبینی کریە د ئەڤێ حەفتیێ دا کۆمسیونا هەلبژارتنێن عیراقێ کۆمببیت و بڕیارا دوماهیێ لدوور دەمێ ئەنجامدانا هەلبژارتنێن پەرلەمانێ کوردستانێ بۆ سەرۆکایەتییا هەرێمێ بهنێریت.”

 دیارکر ژی، پارتی دیموکراتی کوردستان چاڤەڕێیە کۆمسیونا هەلبژارتنێن عیراقێ بڕیارا بڕێڤەچوونا هەلبژارتنێن پەرلەمانێ کوردستانێ بۆ سەرۆکایەتییا هەرێمێ بهنێریت و پاشی ل دووڤ ڕێنماییان و کارانکرنا کۆمسیونا هەلبژارتنێن هەرێما کوردستانێ دێ دەست ب ئامادەکارییان کەت.

 پەیڤدارێ پشکا هەلبژارتنێن پارتی گۆتژی:”ئەگەر چ ئالۆزییێن سیاسی و بهانە نە هێنە دروستکرن، هەلبژارتنێن پەرلەمانێ کوردستانێ دێ ل دەمێ خۆ یێ دەستنیشانکری هێنە کرن.

هەوار محەمەد ئاشکرا کر،”چ بهانەیەک نینە، کۆمسیونا هەلبژارتنێن عیراقێ، دەمێ دەستنیشانکری یێ بڕێڤەچوونا هەلبژارتنێن هەرێما کوردستانێ ب نە گونجای ل قەلەم بدەت، چوونکی پێشتر ژی پارتی دیموکراتی کوردستان  ل سالێن (2009 – 2013) سەربوور دگەل بڕێڤەچوونا سێ هەلبژارتنێن هەرێما کوردستانێ و عیراقێ د ئێک دەمدا هەبوویە.”