وەزیرێ بەڕەڤانییا عیراقێ: کەمپا هۆل دلگرانیەکا مەزن بۆ حکومەتا عیراقێ دروستکریە

سابت محەمەد سەعید، وەزیرێ بەڕەڤانییا عیراقێ ڕاگەهاند، کەمپا هۆل بوویە جهەکێ ڤەحەواندنێ بۆ چەکدارێن داعش و دلگرانیەکا مەزن بۆ حکومەتا عیراقێ دروستکریە.

 دیارکر، پێدڤیە ب زوو ترین دەم هەمی وەلات وەلاتییێن خۆ ژ کەمپا هۆل ڤەگەڕینن و وێ کەمپێ ژی ب دائێخن.

کەمپا هۆل، دکەڤیتە باشوورێ باژێرکێ هۆل ل پارێزگەها حەسەکێ یا رۆژئاڤایێ کوردستانێ، ئەو کەمپە ل بن دەستهەلاتا ئیدارەیا خۆسەر دایە و هێزێن سووریا دیموکرات(هەسەد)ێ چاڤدێری و بڕێڤەبرنا کاروبارێن ئەمنی یێن وێ کەمپێ دکەن.

دهێتە زانین، ئەو کەمپە یا تایبەتە ب خێزان و کەسوکارێن چەکدارێن داعش ڤە، ل گۆرەی ئاماران زێدەتری 50 هزار کەسێن سەر ب داعش ڤە دناڤ وێ کەمپێ دانە و نیڤەک ژ ئاکنجییێن وێ کەمپێ ژیێ وان ژ 18 سالان کێمترە و پتریا وان ژی عیراقینە.

کەمپا هۆل ب مەترسی بۆ دووبارە سەرهلدانا داعش دهێتە ل قەلەمدان، چەندین جاران ژی ئالۆزی تێدا دروستبووینە، لەورا ب فەرمی داخواز ژ وەلاتان هاتیە کرن کو وەلاتییێن خۆ ژ وێ کەمپێ ڤەگۆهێزنە وەلاتێن خۆ.

ژ لایەکێ دیڤە وەزیرێ بەڕەڤانییا عیراقێ ئاماژە کر، سەروەرییا عیراقێ هێلا سۆرە، پێدڤیە دۆسەیا بۆردومانێن تورکیا ل عیراقێ، ب شێوەیەکێ سیاسی بهێتە چارەسەرکرن.

دەربارەی پرسا چەکی سابت محەمەد گوت:”ئەم ل عیراقێ دوپات دکەین کو ب چ ڕەنگان ڕێکێ نادەین چەک ژ دەرڤەی کونرۆلا دەولەتێ بیت.”