كونسۆلێ ئه‌مریكا : نه‌فتا هه‌رێما كوردستانێ بۆ مه‌ بابه‌ته‌كێ گرنگه‌

كونسۆلێ گشتییێ ئه‌مریكا ل هه‌ولێرێ هیڤى خوازه‌ پرۆژه‌ قانوونا نه‌فت و گازێ ب هه‌ڤپشكى دناڤبه‌را هه‌ردوو حكومه‌تێن عیراقێ و هه‌رێما كوردستانێدا بهێته‌ ئاماده‌كرن و په‌سه‌ندكرن و دبێژیت : بابه‌تێ نه‌فتا هه‌رێما كوردستانێ بۆ وه‌لاتێ مه‌ بابه‌ته‌كێ گرنگه‌.

كه‌مال محه‌مه‌د سالح وه‌زیرێ كاره‌بێ و سامانێن سروشتى یێ حكومه‌تا هه‌رێما كوردستانێ ب وه‌كاله‌ت پێشوازى ل مارك سترۆ كونسۆلێ گشتییێ ئه‌مریكا ل هه‌ولێرێ كر.

وه‌زاره‌تا كاره‌با هه‌رێما كوردستانێ دراگه‌هاندنه‌كێدا ئاماژه‌ ب هندێ كر، د كۆمبوونه‌كێدا به‌حسا ره‌وشا هه‌ردوو كه‌رتێن كاره‌بێ و نه‌فتا هه‌رێما كوردستانێ هاته‌كرن.

وه‌كو دراگه‌هاندنێدا هاتى، كونسۆلی ئه‌مریكا بابه‌تێ نه‌فتا هه‌رێما كوردستانێ بۆ وه‌لاتێ خوه‌ ب بابه‌ته‌كێ گرنگ زانى و هیڤى خواستن پرۆژه‌ قانوونا نه‌فت و گازێ ب هه‌ڤپشكى دناڤبه‌را هه‌ردوو حكومه‌تێن عیراقێ و هه‌رێما كوردستانێدا، بهێته‌ ئاماده‌كرن و په‌سه‌ندكرن.

هنارتنا نه‌فتا هه‌رێما كوردستانێ ته‌وه‌ره‌كێ دییێ دیدارێ بوو، ئاماژه‌ ب هندێ ژى هاته‌ كرن، كونسۆلێ گشتییێ ئه‌مریكا پێنگاڤێن وه‌زاره‌تا كاره‌بێ بۆ مفاوه‌رگرتن ژ هێزا رۆژێ بۆ به‌رهه‌مئینانا كاره‌بێ ب گرنگ هژمارتن.

ژلایێ خۆڤه‌ كونسۆلخانه‌یا ئه‌مریكا ل هه‌ولێرێ  دپۆسته‌كیدا ل سه‌ر ئه‌كاونتێ خوه‌ یێ ئێكس ( تویته‌رى ) ل دۆر ناڤه‌رۆكا كۆمبوونێ دیاركر، د دیداره‌كێدا هه‌ردوو لایان به‌حسا بوارێن به‌رفره‌هكرنا هاریكارییان دبوارێن هێزێدا ب تایبه‌تى هێزا نویبوونێ بۆ پشته‌ڤانیكرنا هه‌رێما كوردستانا خۆراگر دناڤ عیراقێدا كر.